హనుమకొండ బస్ స్టేష‌న్ రోడ్‌ విస్తరణ జరిగేనా..? బడా వ్యాపారులకు కొమ్ముకాస్తున్న ఎమ్మెల్యే..!

‘చూడు ఒక వైపే చూడు.. ఇంకో వైపు చూస్తే...’ అన్నట్లుగా ఉంది హనుమకొండ బస్ స్టేష‌న్ రోడ్‌ విస్తరణ పనులు.. మార్కింగ్‌ చేసిన అధికారులు ఒకవైపే కూల్చివేసి మరోవైపు అలాగే వదిలేయడంపై పలు అనుమానాలు వ్యక్తమవుతున్నాయి.

హనుమకొండ చౌరస్తా, నవంబర్‌ 11: ‘చూడు ఒక వైపే చూడు.. ఇంకో వైపు చూస్తే…’ అన్నట్లుగా ఉంది హనుమకొండ బస్ స్టేష‌న్ రోడ్‌ విస్తరణ పనులు.. మార్కింగ్‌ చేసిన అధికారులు ఒకవైపే కూల్చివేసి మరోవైపు అలాగే వదిలేయడంపై పలు అనుమానాలు వ్యక్తమవుతున్నాయి. నగరంలో రోడ్డు విస్తరణ పనులు ప్రధాన రహదారిని ఆక్రమించి బడా వ్యాపారులు బహుళ అంతస్తులు నిర్మించినా ప్రజాప్రతినిధులు, అధికారులు కొమ్ముకాస్తున్నారనే ఆరోపణలు వినిపిస్తున్నాయి. హనుమకొండ బస్ స్టేష‌న్ రోడ్‌ విస్తరణ, అభివృద్ధి పనులకు ఆది నుంచి అడ్డంకులు తొలగడంలేదు.
అధికారులు, ప్రజాప్రతినిధుల నిర్లక్ష్యంతో రోడ్డు విస్తర్ణకు మోక్షం లభించడంలేదు.

నగరాభివృద్ధిలో వెనకడుగు వేసేదిలేదంటున్న స్థానిక ఎమ్మెల్యే ప్రధాన రహదారి వెడల్పు చేయడంలో తలొగ్గారని పలువురు ఆరోపిస్తున్నారు. నిత్యం వేలాది మంది ప్రయాణికులతో ఎప్పుడూ రద్దీగా హనుమకొండ బస్ స్టేష‌న్ రోడ్డు అభివృద్ధికి విస్తరణకు నోచుకోవడంలేదు. హనుమకొండ బస్ స్టేష‌న్ రోడ్డు అభివృద్ధి జరుగుతుందని సంబరపడ్డ ప్రజల కల కలగానే మిగిపోయేలా కనిపిస్తుంది. ప్రజాప్రతినిధులు, అధికారులు పట్టింపులేనితనంతో బడా షాపింగ్‌మాల్స్​‍కు మార్కింగ్‌ చేశారు. పనులు ముందుకు తీసుకెళ్లకుండా అలాగే వదిలేశారు. ఇటువైపు జవహర్‌లాల్‌ నెహ్రూ స్టేడియం(జేఎన్‌ఎస్), కాకతీయ ప్రభుత్వ డిగ్రీ కాలేజీకి సంబంధించిన భూమి కొంత రోడ్డు విస్తరణకు కేటాయించడంతో ప్రహారీగోడను కూల్చివేశారు.

వంద ఫీట్ల రోడ్డుకు విస్తరించేనా..?

నిత్యం వేలాది మంది ప్రయాణికులు, రద్దీగా ఉండే హనుమకొండ బస్ స్టేష‌న్ రోడ్డు విస్తరణకు మూడు అడుగులు ముందుకు ఆరడుగులు వెనక్కి అన్నట్లుగా కొనసాగుతోంది. స్థానిక ఎమ్మెల్యే నాయిని రాజేందర్‌రెడ్డి రోడ్డు విస్తరణకు కొబ్బరికాయకొట్టి 15 రోజులు గడిచినా పనులు మాత్రం తూతూమంత్రంగానే కొనసాగుతుండటంపై మండిపడుతున్నారు. ప్రధాన రోడ్డులోని సెంటర్‌ పాయింట్‌ మార్కింగ్‌ పూర్తియింది. దీనికి రెండు వైపులా 50 అడుగుల చొప్పున మొత్తం వంద అడుగుల రోడ్డు విస్తరించనున్నారు. కొన్ని భవనాలను ఎంతమేరకు తొలిగించాలనే అధికారులు మార్కింగ్‌ చేశారు. దీంతో బడావ్యాపారులు ఏ మేరకు తొలిగిస్తారోనన్న దానిపై అంచనాలు వేసుకుంటున్నారు. ఈ రోడ్లలో సరిహద్దులు తదితర అన్నింటినీ గుర్తించేందుకు ఉపగ్రహ సర్వే చేపట్టారు. అత్యాధునిక యంత్రాలతో కొలతలు నమోదు చేశారు. ఏళ్లతరబడి నిర్ణీత రహదారి వెడల్పును మధ్యలోనే ఆపేశారు. సంవత్సరాలు గడుస్తున్నా రోడ్డు విస్తర్ణకు నోచుకోకపోవడంతో ప్రజలు ప్రమాదాల బారిన పడుతున్నారు.

కూల్చివేస్తారా.. కొమ్ము కాస్తారా..!

‘ఎంగిపెళ్లి సుబ్బిచావుకు వచ్చినట్లు’గా వరంగల్‌ పశ్చిమ నియోజకవర్గ ఎమ్మెల్యే పరిస్థితి అలాగే ఉందని ప్రజలు గుసగుసలాడుతున్నారు. వంద ఫీట్ల రోడ్డుకు మార్కింగ్‌ చేసిన అధికారులు అలాగే వదిలేయడంతో పనులు జరిగేనా అన్నట్లుగా అనుమానాలు వ్యక్తమవుతున్నాయి. ప్రజాప్రతినిధులు, అధికారులు బడావ్యాపారులకు కొమ్ముకాస్తున్నారనే ఆరోపణలు లేకపోలేదు. రోడ్డు విస్తర్ణకు హడావుడిగా మార్కింగ్‌ అధికారులు బడావ్యాపారులకు తలొగ్గారనే అనుమానాలు వ్యక్తమవుతున్నాయి. స్థానిక ఎమ్మెల్యే సైతం పట్టువీడని విక్రమార్కుడిలా నయీంనగర్‌ నాలాను ఆక్రమించి నిర్మాణించిన ఇళ్లను కూల్చివేసి నూతనంగా నాళాలను నిర్మించడంపై ప్రజలు ఆనందం వ్యక్తం చేస్తుంటే హనుమకొండ బస్ స్టేష‌న్ రోడ్డు విస్తర్ణకు కూల్చివేయకుండా ‘కుమ్మకయ్యారనే’ ఆరోపణలు వెల్లువెత్తుతున్నాయి.

ఇరుక్కుగా మారిన బస్ స్టేష‌న్ రోడ్డు..

హనుమకొండ బస్ స్టేష‌న్ రోడ్డు ఇరుక్కుగా మారింది. అటువైపు ప్రయాణించాలనే ప్రయాణికులకు ఇబ్బందులు తప్పడంలేదు. రోడ్డు విస్తరించాల్సిన అధికారులు మార్కింగ్‌ చేసి వదిలేయడంతో ప్రయాణికులు ఆగ్రహం వ్యక్తం చేస్తున్నారు. అసలే ఇరుకుగా ఉన్న రోడ్డు ఒకవైపు చిరువ్యాపారాలు, ఆటోడ్రైవర్లు స్టాండ్‌ ఏర్పాటుచేసుకుని ఉన్నారు. రోడ్డు విస్తర్ణకు ఇప్పటికే ఒకవైపు ఉన్న డ్రైనేజీని మొత్తానికి మూసివేశారు. హనుమకొండ జవహర్‌లాల్‌ నెహ్రూ స్టేడియం(జేఎన్‌ఎస్)లో కొంతమేరకు స్థలాన్ని సేకరించి గోడకు అవతలి వైపు నుంచి డ్రైనేజీ నిర్మించారు. ఇక చిన్నపాటి వర్షం పడితేచాలు బస్స్టేషన్‌ రోడ్‌లోని కాకాజీకాలనీ మూలమలుపు వద్ద డ్రైనేజీ వరదాలా పొంగిపొర్లుతుంది.

హనుమకొండలోని కాకతీయ ప్రభుత్వ కాలేజీలో విద్యనభ్యసించే విద్యార్థులు బయటకు రాలేని పరిస్థితి నెలకొనేది. రోడ్డుపైకి వరదలా నీరుచేరడంతో శాశ్వత పరిష్కారం చూపాలని స్థానిక ఎమ్మెల్యే, కార్పొరేటర్‌ కోరడంతో కేడీసీ ప్రిన్సిపాల్‌ సైతం కాలేజీ స్థలాన్ని రోడ్డు విస్తరణకు ఇచ్చేశారు. అవతలి వైపు బడా షాపింగ్‌మాల్స్​‍, హాస్పిటల్స్​‍ ఉండటంతో రోడ్డు విస్తర్ణకు నోచుకోవడంలేదని ప్రజలు ఆవేదన వ్యక్తం చేస్తున్నారు. ప్రజాప్రతినిధులు, అధికారులు సరిగ్గా పనిచేస్తే ఎప్పుడో రోడ్డు వెడల్పు అయ్యేదని ప్రజలు వాపోతున్నారు. ఇప్పటికైనా రోడ్డును వంద ఫీట్లకు విస్తరిస్తారా.. లేక బడావ్యాపారులతో కుమ్మక్కై రోడ్డు ఎన్ని ఫీట్లకు చేస్తారో వేచి చూడాలి?