పరాజయాల బాధ్యత నాదే

‘హృదయకాలేయం’, ‘కొబ్బరిమట్ట’ తర్వాత నా కెరీర్‌లో గుర్తుండిపోయే మంచి సినిమాల్లో ఇది ఒకటిగా నిలుస్తుంది. వందశాతం ప్రేక్షకులకు వినోదాన్ని పంచుతుంది’ అని అన్నారు సంపూర్ణేష్‌బాబు. ఆయన కథానాయకుడిగా నటిస్తున్న చిత్రం ‘క్యాలీఫ్లవర్‌’. ఆర్‌.కె. మలినేని దర్శకుడు. ఆశాజ్యోతి గోగినేని నిర్మిస్తున్నారు. ఈ నెల 26న విడుదలకానుంది. మంగళవారం హైదరాబాద్‌లో చిత్రబృందం ట్రైలర్‌ను విడుదలచేసింది. ఈ సందర్భంగా సంపూర్ణేష్‌బాబు మాట్లాడుతూ ‘శీలాన్ని కోల్పోయిన ఓ మగాడి కథ ఇది. తనకు జరిగిన అన్యాయంపై అతడు ఎలాంటి పోరాటం చేశాడన్నది ఆసక్తికరంగా ఉంటుంది. ఇందులో ఆండీఫ్లవర్‌, క్యాలీఫ్లవర్‌గా ద్విపాత్రాభినయంలో కనిపిస్తా. ‘కొబ్బరిమట్ట’ తర్వాత నేను చేసిన సినిమాలు సరిగా ఆడలేదు. ఆ పరాజయాల బాధ్యత నాదే. ఈ సినిమాతో మళ్లీ విజయాల బాట పడతాననే నమ్మకముంది’ అని తెలిపారు. రెండున్నర గంటల పాటు ప్రేక్షకులను నవ్వించే చిత్రమిదని నిర్మాత పేర్కొన్నారు. మగాడు కూడా శీలాన్ని కాపాడుకోవడం అవసరమనే పాయింట్‌తో ఈ సినిమాను తెరకెక్కిస్తున్నామని దర్శకుడు చెప్పారు. ఈ కార్యక్రమంలో గూడూరు శ్రీధర్‌, రమేష్‌, సత్యనారాయణ తదితరులు పాల్గొన్నారు.