Cauliflower | భువనేశ్వర్ : ఓ యువకుడు తన తల్లి పట్ల క్రూరంగా ప్రవర్తించాడు. తన పొలంలో నుంచి కాలీఫ్లవర్ తెంపిందని తల్లిని కుమారుడు స్తంభానికి కట్టేసి, తీవ్రంగా చితకబాదాడు. ఈ దారుణ ఘటన ఒడిశాలోని కియోంఝార్ జిల్లాలో వెలుగు చూసింది.
వివరాల్లోకి వెళ్తే.. కియోంఝార్ జిల్లాలోని సరసపాసి గ్రామానికి చెందిన ఓ 70 ఏండ్ల వృద్ధురాలు ఒంటరిగా నివసిస్తోంది. ఆమె కుమారులు వేర్వేరుగా ఉంటున్నారు. అయితే చిన్న కుమారుడి పొలంలోకి వెళ్లిన తల్లి.. అక్కడున్న కాలీఫ్లవర్ను తెంపి ఇంటికి తీసుకొచ్చింది. తన అనుమతి లేకుండా కాలీఫ్లవర్ ఎందుకు తెంపావని తల్లిని కుమారుడు నిలదీశాడు. అంతటితో ఆగకుండా ఆ వృద్ధురాలిని స్తంభానికి కట్టేసి తీవ్రంగా చితకబాదాడు.
వృద్ధురాలిని కాపాడబోయిన స్థానికులను కూడా బెదిరించాడు. అయినప్పటికీ స్థానికులు ఆమెను ప్రాణాలతో రక్షించారు. అనంతరం బాధితురాలిని బసుదేవ్పూర్ కమ్యూనిటీ హెల్త్ సెంటర్కు తరలించారు. ఆ తర్వాత పోలీసులకు సమాచారం అందించారు. బాధితురాలి వాంగ్మూలాన్ని నమోదు చేసుకున్న పోలీసులు, నిందితుడిపై కేసు నమోదు చేశారు.