minister’s home attcked | మంత్రి ఇంటిపై దాడి.. ‘మేము చనిపోయాక వస్తారా?’ అంటూ పోలీసులపై ఆగ్రహం

minister’s home attcked | ఒక మంత్రి ఇంటిపై దాడి జరిగింది. ముగ్గురు వ్యక్తులు మంత్రి నివాసంపై రాళ్లు రువ్వడంతోపాటు గాజు సీసాలు విసిరారు. తాను వెంటనే పోలీస్‌ అధికారులకు ఫోన్‌ చేసినప్పటికీ వారు స్పందించలేదని ఆ మంత్రి ఆరోపించారు. ‘మేము చనిపోయాక వస్తారా?’ అంటూ పోలీస్‌ యంత్రాంగంపై ఆయన మండిపడ్డారు.

ముంబై: ఒక మంత్రి ఇంటిపై దాడి జరిగింది. ముగ్గురు వ్యక్తులు మంత్రి నివాసంపై రాళ్లు రువ్వడంతోపాటు గాజు సీసాలు విసిరారు. తాను వెంటనే పోలీస్‌ అధికారులకు ఫోన్‌ చేసినప్పటికీ వారు స్పందించలేదని ఆ మంత్రి ఆరోపించారు. ‘మేము చనిపోయాక వస్తారా?’ అంటూ పోలీస్‌ యంత్రాంగంపై ఆయన మండిపడ్డారు. (minister’s home attcked) మహారాష్ట్ర డిప్యూటీ సీఎం ఏక్‌నాథ్ షిండే నేతృత్వంలోని శివసేనకు చెందిన మంత్రి సంజయ్ షిర్సత్‌ నివాసంపై దాడి జరిగింది. గురువారం అర్ధరాత్రి సమయంలో ఛత్రపతి సంభాజీనగర్‌లోని ఆయన ఇంటిపై ముగ్గురు యువకులు రాళ్లు రువ్వడంతో పాటు బాటిల్స్‌ విసిరారు. భద్రతా సిబ్బంది, పోలీసులు వెంటనే జోక్యం చేసుకున్నారు. ఆ ముగ్గురు వ్యక్తులను అదుపులోకి తీసుకున్నారు. అయితే నిందితులను పట్టుకునే సందర్భంగా జరిగిన తోపులాటలో ఇద్దరు పోలీసులకు స్వల్ప గాయాలయ్యాయి.

కాగా, తన ఇంటిపై దాడి జరిగిన వెంటనే పోలీస్ కమిషనర్‌ను సంప్రదించడానికి తాను ప్రయత్నించానని, అయితే ఆయన ఫోన్ స్విచ్ఆఫ్‌లో ఉండటంతో మాట్లాడలేకపోయానని మంత్రి సంజయ్ షిర్సత్‌ తెలిపారు. ఒక డిప్యూటీ కమిషనర్ ఆఫ్ పోలీస్ (డీసీపీ) రెండున్నర గంటల ఆలస్యంగా సంఘటనా స్థలానికి చేరుకున్నారని, డైరెక్టర్ జనరల్ ఆఫ్ పోలీస్ (డీజీపీ) జోక్యం చేసుకున్న తర్వాతే ఆయన అక్కడికి వచ్చారని ఆయన విమర్శించారు.

మరోవైపు పోలీస్‌ ఉన్నతాధికారులు శాంతిభద్రతలను నిర్లక్ష్యం చేస్తున్నారని, నేరాలను అదుపు చేయడం కంటే డబ్బు సంపాదించడం, లాభదాయకమైన పోస్టింగ్‌లు దక్కించుకోవడానికే పోలీసులు ఎక్కువ ఆసక్తి చూపుతున్నారని శుక్రవారం మీడియా సమావేశంలో మంత్రి సంజయ్ షిర్సత్‌ ఆరోపించారు. ‘నా ఇంటిపై దాడి జరిగింది. నగరంలో ప్రతిరోజూ హత్యలు జరుగుతున్నాయి. మేము చనిపోయిన తర్వాతే పోలీసులు వస్తారా?’ అని ఆయన ప్రశ్నించారు.

అలాగే మాదకద్రవ్యాలు బహిరంగంగా అమ్ముడవుతున్నాయని, పోలీసుల ఆశీస్సులతోనే అక్రమ జూద కేంద్రాలు నడుస్తున్నాయని మంత్రి సంజయ్ షిర్సత్‌ ఆరోపించారు. అయితే పోలీస్ కమిషనర్ కేవలం వసూళ్లపైనే ఆసక్తి చూపుతున్నారని, కమిషనర్‌కు కేవలం పింప్రి-చించ్‌వాడ్‌లో లాభదాయకమైన పోస్టింగ్ పొందడంపైనే ఆసక్తి ఉన్నదని విమర్శించారు. పోలీసుల వసూళ్లకు సంబంధించిన పూర్తి జాబితాను ముఖ్యమంత్రికి తాను అందజేస్తానని మీడియాతో ఆయన అన్నారు.

అయితే మంత్రి ఇంటిపై దాడి చేసిన ముగ్గురు నిందితులపై పలు సెక్షన్ల కింద పోలీసులు కేసు నమోదు చేశారు. ఈ సంఘటన వెనుక ఉన్న ఉద్దేశం ఏమిటి, ఇందులో ఎవరిదైన ప్రమేయం ఉన్నదా? అన్న కోణంలో దర్యాప్తు చేస్తున్నట్లు పోలీస్‌ అధికారి తెలిపారు.