ఏఐలోనూ జాతి వివక్ష

కృత్రిమ మేధ (ఏఐ) మానవుల కన్నా తెలివైనదన్న మాటను వింటున్నాం. ఎలాన్‌ మస్క్‌ ఇప్పటికే ఏఐ ఆ స్థాయికి చేరుకుందని అంటున్నారు.

న్యూఢిల్లీ, జూన్‌ 24: కృత్రిమ మేధ (ఏఐ) మానవుల కన్నా తెలివైనదన్న మాటను వింటున్నాం. ఎలాన్‌ మస్క్‌ ఇప్పటికే ఏఐ ఆ స్థాయికి చేరుకుందని అంటున్నారు. కానీ మానవాళి తెలివితేటలు, మేధస్సుతో పాటు అతని నుంచి అత్యంత నీచమైన కొన్ని పక్షపాతాలను ఏఐ వారసత్వంగా పొంది ఉండవచ్చని ఐక్యరాజ్య సమితి జరిపిన ఒక పరిశోధన హెచ్చరిస్తున్నది.

కొంతమంది పరిశోధకులు 133 ఏఐ వ్యవస్థలను అధ్యయనం చేయగా, వాటిలో దాదాపు సగం (44 శాతం) లింగ పక్షపాతాన్ని ప్రదర్శించాయి. పెద్ద భాషా నమూనాలు (ఎల్‌ఎల్‌ఏంలు) మహిళలను పదేపదే ఇంటికి, పిల్లల సంరక్షణకే ముడిపెట్టగా, పురుషుల విషయానికి వచ్చినప్పుడు వ్యాపారం, నాయకత్వం లాంటి అంశాల గురించే ప్రస్తావించింది. కొన్ని ఏఐ వ్యవస్థలు మహిళలను లైంగిక వస్తువులుగా, పురుషుల ఆధీనంలోని వ్యక్తులుగా చిత్రీకరించేలా స్పందనలను రూపొందించాయి.