కోలుకొన్నాక 3 నెలలకు టీకా

• తొలి డోసు వేసుకొన్నాక వైరస్‌ సోకితే రికవరీ అయిన 3 నెలలకు రెండో డోసు
• బాలింతలు వ్యాక్సిన్‌ వేసుకోవచ్చు
• కేంద్రం కొత్త మార్గదర్శకాలు
• టీకా వేసుకున్న 14 రోజుల తర్వాత రక్తదానం చేయొచ్చు

న్యూఢిల్లీ, మే 19: కరోనా బారినపడిన వారు వైరస్‌ నుంచి కోలుకున్నాక 3 నెలల తర్వాతే టీకా వేసుకోవాలని కేంద్రం తెలిపింది. ఈ మేరకు కొవిడ్‌ వ్యాక్సిన్‌ అడ్మినిస్ట్రేషన్‌ నిపుణుల బృందం (ఎన్‌ఈజీవీఏసీ) చేసిన సిఫార్సులకు బుధవారం ఆమోదం తెలిపింది. వ్యాక్సినేషన్‌ విధానంలో నూతన మార్గదర్శకాలను అమలుచేయాలని రాష్ర్టాలను ఆదేశించింది.

• కొవిడ్‌ సోకినవారు కోలుకున్న మూడు నెలల తర్వాత వ్యాక్సిన్‌ వేసుకోవాలి.
• ప్లాస్మా చికిత్స తీసుకున్నవారు దవాఖాన నుంచి డిశ్చార్జ్‌ అయిన మూడు నెలల తర్వాత టీకా వేసుకోవాలి.
• తొలి డోసు వేసుకున్నాక కొవిడ్‌ సోకితే, వ్యాధి నుంచి కోలుకున్న మూడు నెలల తర్వాత వ్యాక్సిన్‌ వేసుకోవాలి.
• ఇతర తీవ్రమైన వ్యాధులతో దవాఖాన లేదా ఐసీయూలో చికిత్స తీసుకునేవారు కోలుకున్నాక 4-8 వారాల తర్వాత టీకా వేసుకోవాలి.
• టీకా వేసుకున్న వారు, కొవిడ్‌ నుంచి కోలుకున్న వారు (ఆర్టీ-పీసీఆర్‌ పరీక్షలో నెగెటివ్‌ రావాలి) 14 రోజుల తర్వాత రక్తదానం చేయొచ్చు.
• బాలింతలు వ్యాక్సిన్‌ వేసుకోవచ్చు.
• వ్యాక్సిన్‌ వేసేముందు ర్యాపిడ్‌ యాంటీజెన్‌ పరీక్షలు చేయనవసరం లేదు.