యూపీలో దళిత బాలురపై దాష్టీకం

బీజేపీ పాలిత యూపీలో దళితులపై మరో దారుణం చోటుచేసుకుంది. దొంగతనం చేశారన్న అనుమానంతో ఇద్దరు కోళ్ల ఫారం యజమానులు దాష్టీకానికి దిగారు. ముగ్గురు దళిత బాలురను కొట్టి, వారికి గుండు గీయించి, ముఖానికి నల్లరంగు పులిమి గ్రామంలో ఊరేగించారు.

• చోరీ నెపంతో ముగ్గురికి శిరోముండనం
• ముఖంపై నల్లరంగు పులిమి ఊరేగింపు

భరూచ్‌, అక్టోబర్‌ 10: బీజేపీ పాలిత యూపీలో దళితులపై మరో దారుణం చోటుచేసుకుంది. దొంగతనం చేశారన్న అనుమానంతో ఇద్దరు కోళ్ల ఫారం యజమానులు దాష్టీకానికి దిగారు. ముగ్గురు దళిత బాలురను కొట్టి, వారికి గుండు గీయించి, ముఖానికి నల్లరంగు పులిమి గ్రామంలో ఊరేగించారు. ఈ దారుణం యూపీలోని భరూచ్‌ జిల్లా తాజ్‌పూర్‌ తెడియా గ్రామంలో మంగళవారం జరిగింది. 5 కిలోల గోధుమలు అపహరించారని ఆరోపిస్తూ 12-14 ఏండ్ల వయసున్న ముగ్గురు బాలురను కోళ్లఫారాల యజమానులు నజీమ్‌, ఖాసింలు దారుణంగా కొట్టారు. అంతటితో ఆగకుండా వారికి శిరోముండనం చేయించారు.

ముఖానికి నల్ల రంగు పూశారు. రెండు చేతులు కట్టేసి, ముంజేతులపై ‘దొంగ’ అని రాసి గ్రామంలో ఊరేగించారు. ఈ ఘటనను వీడియో కూడా తీశారు. బాధితుల కుబుంబ సభ్యుల ఫిర్యాదు మేరకు నిందితులపై కేసు నమోదు చేసినట్టు పోలీసులు తెలిపారు. ఇప్పటికే ఈ కేసుకు సంబంధించి ముగ్గురిని అరెస్ట్‌ చేయగా, మాజీ గ్రామ పెద్ద పరారీలో ఉన్నాడు. ముందు జాగ్రత్త చర్యగా గ్రామంలో పోలీసు బలగాలను మోహరించారు.