DNA test for tribals | గిరిజనులకు డీఎన్‌ఏ పరీక్ష చేయిస్తామన్న బీజేపీ మంత్రి.. ఆయన రాజీనామాకు డిమాండ్‌

DNA test for tribals | గిరిజనులను హిందువులుగా నిర్ధారించేందుకు డీఎన్‌ఏ పరీక్ష చేయిస్తామని బీజేపీ మంత్రి అన్నారు. ఆయన చేసిన ఈ వ్యాఖ్యలపై దుమారం చెలరేగింది. కాంగ్రెస్‌, ఆదివాసీ పార్టీలు ఆయనపై మండిపడ్డాయి. బీజేపీ మంత్రి రాజీనామాకు డిమాండ్‌ చేశాయి.

జైపూర్‌: గిరిజనులను హిందువులుగా నిర్ధారించేందుకు డీఎన్‌ఏ పరీక్ష చేయిస్తామని బీజేపీ మంత్రి అన్నారు. (DNA test for tribals) ఆయన చేసిన ఈ వ్యాఖ్యలపై దుమారం చెలరేగింది. కాంగ్రెస్‌, ఆదివాసీ పార్టీలు ఆయనపై మండిపడ్డాయి. బీజేపీ మంత్రి రాజీనామాకు డిమాండ్‌ చేశాయి. రాజస్థాన్ విద్యాశాఖ మంత్రి, కోటాలోని రామ్‌గంజ్ మండికి చెందిన బీజేపీ ఎమ్మెల్యే మదన్‌ దిలావర్ వివాదస్పద వ్యాఖ్యలు చేశారు. ఒక కార్యక్రమంలో మాట్లాడిన ఆయన గిరిజనులు హిందువులు కాదంటూ భారతీయ ఆదివాసీ పార్టీ (బీఏపీ) సభ్యులు చేసిన ఆరోపణలపై స్పందించారు. గిరిజనులు హిందువులా? కాదా? అన్నది వారి పూర్వీకులను అడుగుతామని అన్నారు. ‘వంశవృక్షాన్ని నమోదు చేసేందుకు వారిని (గిరిజనులను) సంప్రదిస్తాం. వారు హిందువులు కాకపోతే, వారి పిల్లలకు తండ్రులా కాదా అని నిర్ధారించడానికి డీఎన్‌ఏ పరీక్షలు నిర్వహిస్తాం’ అని అన్నారు.

కాగా, మంత్రి మదన్ దిలావర్ చేసిన వివాదాస్పద వ్యాఖ్యలపై బన్స్వారా ఎంపీ రాజ్‌కుమార్ రోట్ మండిపడ్డారు. డీఎన్‌ఏ పరీక్ష కోసం గిరిజనులు తమ రక్త నమూనాలను దిలావర్, రాజస్థాన్ సీఎం భజన్‌లాల్ శర్మకు పంపాలని కోరుతూ ప్రచారాన్ని ప్రారంభిస్తామని అన్నారు. గిరిజన సమాజాన్ని అవమానించిన ఆయన క్షమాపణ చెప్పాలని, మంత్రి పదవికి రాజీనామా చేయాలని డిమాండ్‌ చేశారు.

మరోవైపు రాజస్థాన్ కాంగ్రెస్ అధ్యక్షుడు గోవింద్ సింగ్ దోతస్రా కూడా మంత్రి మదన్‌ దిలావర్‌ వ్యాఖ్యలను ఖండించారు. ఆయనను మానసిక రోగిగా అభివర్ణించారు. దిలావర్‌ ప్రకటన ఆయన మేధో అసమర్థతను తెలియజేస్తున్నదని విమర్శించారు.

కాగా, ప్రతాప్‌గఢ్‌లో ఆదివాసీ యువమోర్చా ఆధ్వర్యంలో నిరసన చేపట్టారు. బీజేపీ మంత్రి మదన్‌ దిలావర్ దిష్టిబొమ్మను దగ్ధం చేశారు.