Rahul Gandhi | ఇండియా బ్లాక్ పార్టీలకు హైటీ ఏర్పాటు చేసిన రాహుల్.. సీఈసీకి వ్యతిరేకంగా చేపట్టాల్సిన పోరుపై చర్చ

Rahul Gandhi : సీఈసీకి వ్యతిరేకంగా చేపట్టాల్సిన ఉద్యమ ప్రణాళికపై చర్చించేందుకు కాంగ్రెస్ అగ్రనేత రాహుల్ గాంధీ మంగళవారం ఢిల్లీలోని తన నివాసంలో హై టీ ఏర్పాటు చేశారు.

Rahul Gandhi : సీఈసీకి వ్యతిరేకంగా చేపట్టాల్సిన ఉద్యమ ప్రణాళికపై చర్చించేందుకు కాంగ్రెస్ అగ్రనేత రాహుల్ గాంధీ మంగళవారం ఢిల్లీలోని తన నివాసంలో హై టీ ఏర్పాటు చేశారు. ఇండియా బ్లాక్ కూటమి పార్టీలతోపాటు వివిధ విద్యార్థి సంఘాలు, ప్రజా సంఘాలు ఈ హై టీ మీటింగ్‌కు హాజరయ్యాయి. వోట్ చోరీ అంశం, సీఈసీ రాజీనామా అంశంపై ప్రధానంగా చర్చించినట్లు తెలుస్తోంది.

ఈ సమావేశానికి కాంగ్రెస్ అగ్రనేత సోనియా గాంధీతోపాటు, ఆ పార్టీ జాతీయాధ్యక్షుడు మల్లికార్జున ఖర్గే వంటి నేతలు హాజరయ్యారు. ఈ సమావేశంపై రాహుల్ గాంధీ ఎక్స్ వేదికగా స్పందించారు. ప్రజాస్వామ్యాన్ని పరిరక్షించేందుకు చేపట్టిన ప్రజా ఉద్యమంలో ఈ సమావేశం ఒక భాగమని రాహుల్ అన్నారు. ఈ ఉద్యమాన్ని కొనసాగించేందుకు భాగస్వాములంతా ఏకమయ్యారు అని ఆయన తెలిపారు. టీ తర్వాత ఈ అంశంపై మీడియాతో తామంతా మాట్లాడుతామని రాహుల్ వెల్లడించారు.

అందరూ కలిసి సంఘటితంగా, సమన్వయంతో ఉద్యమం చేయడం, వ్యూహాత్మకంగా ఆందోళన నిర్వహించడం వంటివి ప్రధాన అంశాలుగా హైటీలో చర్చించినట్లు తెలుస్తోంది. ప్రతిపక్షాలు తమ అభిప్రాయాలు తెలిపేందుకు కూడా ఈ సమావేశం ఒక వేదికగా నిలిచింది. సీఈసీ రాజీనామా కోరుతూ ఇండియా బ్లాక్ కూటమి పార్టీలు సోమవారం సుప్రీంకోర్టు వరకు ర్యాలీ నిర్వహించిన సంగతి తెలిసిందే.

జ్ఞానేష్ కుమార్ రాజీనామా డిమాండ్‌ను మరింత ఉధృతం చేసేందుకు ప్రతిపక్షాలు ప్రయత్నిస్తున్నాయి. అయితే, ఈ ఉద్యమాన్ని కేంద్ర ప్రభుత్వం వీలైనంత అణచివేసేందుకు ప్రయత్నిస్తోంది. చివరకు నిరసన జరిగే జంతర్ మంతర్‌ను నిరసన ప్రదేశంగా తొలగిస్తూ ఢిల్లీ పోలీసులు నిర్ణయం తీసుకున్నారు.