Parliament: ప్రోరోగ్ కాకుండా 88 రోజులుగా వ‌ర్షాకాల స‌మావేశాలు.. పార్ల‌మెంట్‌లో కొత్త రికార్డు

Parliament: పార్ల‌మెంట్ వ‌ర్షాకాల స‌మావేశాల్లో కొత్త రికార్డు న‌మోదు అయ్యింది. ఆగ‌స్టు 13వ తేదీన పార్ల‌మెంట్‌ను నిర‌వ‌ధికంగా వాయిదా వేశారు. కానీ 88 రోజులు అవుతున్నా.. స‌మావేశాల‌ను ఇంకా అధికారికంగా ముగించ‌లేదు.

న్యూఢిల్లీ: పార్ల‌మెంట్ వ‌ర్షాకాల స‌మావేశాల్లో కొత్త రికార్డు న‌మోదు అయ్యింది. ఉభ‌య‌స‌భ‌లు 88 రోజులుగా వాయిదా ప‌డ్డాయి. ఆగ‌స్టు 13వ తేదీన పార్ల‌మెంట్‌ను వాయిదా వేశారు. కానీ ఆ స‌మావేశాల‌ను ముగించిన‌ట్లు ప్ర‌క‌టించ‌లేదు. దీంతో 2008లో న‌మోదు అయిన 87 రోజుల రికార్డును ఇప్పుడు పార్ల‌మెంట్ బ్రేక్ చేసింది. పార్ల‌మెంట్ స‌మావేశాల‌ను ర‌ద్దు చేయ‌కుండా కొంత‌కాలం వాయిదా వేయ‌డాన్ని ప్రోరోగ్ అంటారు. సోమ‌వారం నాటికి లోక్‌స‌భ కానీ, రాజ్య‌స‌భ కానీ ఇంకా అధికారికంగా ప్రోరోగ్ కాలేదు. దీని ద్వారా వ‌ర్షాకాల స‌మావేశాల‌ను స్వ‌ల్ప వ్య‌వ‌ధి కోసం మ‌ళ్లీ నిర్వ‌హిస్తార‌న్న అభిప్రాయాలు వ్య‌క్తం అవుతున్నాయి. షార్ట్ నోటీసు ఇచ్చి పార్ల‌మెంట్ స‌మావేశాలు నిర్వ‌హిస్తార‌ని భావిస్తున్నారు.

మ‌హిళా రిజ‌ర్వేష‌న్ బిల్లు, లోక్‌స‌భ సీట్ల పున‌ర్ విభ‌జ‌న బిల్లుల‌ను ఆమోదింపచేసేందుకు ప్ర‌త్యేక పార్ల‌మెంట్ స‌మావేశాల‌ను ఏర్పాటు చేసే అవ‌కాశాలు ఉన్న‌ట్లు ఊహాగానాలు వినిపిస్తున్న విష‌యం తెలిసిందే. ప్ర‌తిపాదిత బిల్లు ద్వార లోక్‌స‌భ సీట్ల‌ను 543 నుంచి 850కి పెంచ‌నున్నారు. ప్ర‌స్తుత సెష‌న్‌లోనే స‌మావేశాల‌ను పొడిగించాలంటే కనీసం రెండు రోజుల ముందు నోటీసు ఇవ్వాల్సి ఉంటుంది, లేదంటే కొత్త సెష‌న్ కోసం అయితే క‌నీసం 14 రోజుల ముందు నోటీసు ఇవ్వాల్సి వ‌స్తుంది. ఒక‌సారి స‌భ‌లు నిర‌వ‌ధిక వాయిదా ప‌డితే, ఆ స‌మావేశాల‌ను ర‌ద్దు చేసేందుకు రాజ్యాంగం ప్ర‌కారం ఎటువంటి నిర్దేశిత స‌మ‌య నియ‌మం లేదు.