NEET (UG) Examination | మణిపూర్‌లో నీట్‌ పరీక్ష వాయిదా.. ఈ-మెయిల్స్‌, ఆటో కాల్స్‌ ద్వారా విద్యార్థులకు సమాచారం

NEET (UG) Examination | రేపు దేశవ్యాప్తంగా నీట్‌ పరీక్షల జరుగనుంది. ఈ నేపథ్యంలో నేషనల్ టెస్టింగ్ ఏజెన్సీ (NTA).. నీట్ (యూజీ) - 2023 (NEET (UG) - 2023) పరీక్షకు ఏర్పాట్లు పూర్తిచేసింది. దేశవ్యాప్తంగా 13 భాషల్లో, 499 కేంద్రాల్లో పరీక్ష నిర్వహించనున్నారు. అయితే ఈశాన్య రాష్ట్రం మణిపూర్‌లో మాత్రం నీట్‌ పరీక్షలు వాయిదాపడ్డాయి.

ఇంఫాల్‌: రేపు దేశవ్యాప్తంగా నీట్‌ పరీక్షల జరుగనుంది. ఈ నేపథ్యంలో నేషనల్ టెస్టింగ్ ఏజెన్సీ (NTA).. నీట్ (యూజీ) – 2023 (NEET (UG) – 2023) పరీక్షకు ఏర్పాట్లు పూర్తిచేసింది. దేశవ్యాప్తంగా 13 భాషల్లో, 499 కేంద్రాల్లో పరీక్ష నిర్వహించనున్నారు. అయితే ఈశాన్య రాష్ట్రం మణిపూర్‌లో మాత్రం నీట్‌ పరీక్షలు వాయిదాపడ్డాయి. మణిపూర్‌లో పరీక్ష కేంద్రాలు కేటాయించిన అభ్యర్థులందరికీ రేపు నీట్‌ పరీక్ష ఉండదని కేంద్ర విద్యాశాఖ ప్రకటించింది. ఈ మేరకు కేంద్ర విద్యా, విదేశీ వ్యవహారాల శాఖ సహాయ మంత్రి రాజ్‌కుమార్‌ రంజన్‌ సింగ్‌ ఒక ప్రకటన విడుదల చేశారు.

మణిపూర్‌లో ఓ వర్గానికి ఎస్టీ హోదా కల్పించడాన్ని నిరసిస్తూ అక్కడి గిరిజనులు నిరసన వ్యక్తం చేస్తున్నారు. ఈ క్రమంలో గత మూడు, నాలుగు రోజులుగా అక్కడ హింసాత్మక ఘటనలు చోటుచేసుకుంటున్నాయి. ఈ నేపథ్యంలో మణిపూర్‌ పరీక్షా కేంద్రాల్లో నీట్‌ పరీక్షను రద్దు చేశారు. సమాచారాన్ని అభ్యర్థులకు ఆటో కాల్స్‌, ఈ-మెయిల్స్‌ ద్వారా చేరవేసినట్లు తెలిపారు.

కాగా, దేశంలోని వైద్య విద్యా కోర్సులు పదింటిలో ప్రవేశం కోసం NTA ప్రతి ఏటా కట్టుదిట్టంగా నీట్‌ పరీక్ష నిర్వహిస్తుంది. పెన్, పేపర్ విధానంలో ఈ పరీక్ష జరుగుతుంది. మణిపూర్‌ మినహా దేశవ్యాప్తంగా రేపు మధ్యాహ్న 2 గంటల నుంచి సాయంత్రం 5.20 గంటల వరకు పరీక్ష నిర్వహిస్తారు. ఈ పరీక్షలో మొత్తం 180 ప్రశ్నలకు నాలుగేసి మార్కుల చొప్పున 720 మార్కులుంటాయి. ప్రతి తప్పు సమాధానానికి ఒక నెగెటివ్‌ మార్క్‌ ఉంటుంది.