Farmers died : రైతులపైకి దూసుకెళ్లిన కేంద్ర మంత్రి కొడుకు కారు, ఇద్దరు మృతి

Farmers died : కేంద్ర మంత్రి కుమారుడి కారు రైతులపైకి దూసుకెళ్లిన సంఘటనలో ఇద్దరు రైతులు చనిపోయారు. పలువురు రైతులు గాయపడ్డారు. ఈ సంఘటన ఉత్తరప్రదేశ్‌లోని లఖిమ్‌పూర్‌ ఖేరీలో ..

October 3, 2021 / 07:19 PM IST

Farmers died : రైతులపైకి దూసుకెళ్లిన కేంద్ర మంత్రి కొడుకు కారు, ఇద్దరు మృతి

లక్నో : (Farmers died) కేంద్ర మంత్రి కుమారుడి కారు రైతులపైకి దూసుకెళ్లిన సంఘటనలో ఇద్దరు రైతులు చనిపోయారు. పలువురు రైతులు గాయపడ్డారు. ఈ సంఘటన ఉత్తరప్రదేశ్‌లోని లఖిమ్‌పూర్‌ ఖేరీలో ఆదివారం మధ్యాహ్నం జరిగింది. కేంద్ర మంత్రి కుమారుడ్ని అదుపులోకి తీసుకోవాలంటూ రైతులు ఆందోళనకు దిగారు. ప్రమాదానికి కారణమైన కారుతోపాటు మరో రెండు కార్లకు ఆందోళనాకారులు నిప్పుపెట్టారు. పరిస్థితిని అదుపులోకి తీసుకొచ్చేందుకు పెద్ద ఎత్తున పోలీసులను మోహరించారు.

ఉత్తరప్రదేశ్‌ రాష్ట్రంలోని లఖిమ్‌పూర్‌ ఖేరీలో డిప్యూటీ సీఎం కేశవ్‌ ప్రసాద్‌ మౌర్య ఒక కార్యక్రమానికి హాజరవుతున్న విషయం తెలుసుకున్న రైతులు నల్లజెండాలతో నిరసన తెలుపాలని భావించారు. కేంద్రం తీసుకొచ్చిన చట్టాలను వెనక్కి తీసుకోవాలంటూ రోడ్డుపై బైఠాయించేందుకు ప్రయత్నిస్తున్న తరుణంలో ఓ కారు రైతులపైకి దూసుకొచ్చింది. అందరు చూస్తుండగానే రైతులను గుద్దుకుంటూ వెళ్లిపొయింది. ఈ ఘటనలో ఇద్దరు రైతులు మృతిచెందారు. దీంతో ఆగ్రహం వ్యక్తం చేసిన రైతులు ఆశీష్‌ మిశ్రా కారుతో పాటు మరో రెండు కార్లకు నిప్పు పెట్టారు.

కేంద్ర హోం శాఖ సహాయ మంత్రి అజయ్‌ మిశ్రా తనయుడు ఆశీష్‌ మిశ్రా కారు నడుపుతున్నట్లు రైతులు ఆరోపిస్తున్నారు. డిప్యూటీ సీఎం కేశవ్‌ ప్రసాద్‌ మౌర్యకు స్వాగతం పలికి తీసుకొచ్చేందుకు ఆశీష్‌ మిశ్రా వెళ్తున్నట్లుగా సమాచారం. ముగ్గురు రైతులు చనిపోయినట్లు భారతీయ కిసాన్‌ యూనియన్‌ నేతలు తెలిపారు. ప్రమాదానికి కారకుడైన వ్యక్తిని అదుపులోకి తీసుకోవాలంటూ రైతులు ఇంకా ఆందోళన కొనసాగిస్తుండటంతో పరిస్తితి ఇంకా ఉద్రిక్తంగానే ఉన్నది. విషయం తెలుసుకున్న ముఖ్యమంత్రి యోగి ఆదిత్యనాథ్‌.. అదనపు డీజీపీ ప్రశాంత్‌కుమార్‌ను లఖిమ్‌పూర్‌ ఖేరీకి వెళ్లి పరిస్థితి సద్దుమణిగేలా చూడాలని ఆదేశించారు. పలువురు ఉన్నతాధికారులు లఖిమ్‌పూర్‌ ఖేరీలో ఉండి పరిస్థితిని సమీక్షిస్తున్నట్లు డీజీపీ ముకుల్‌ గోయల్‌ తెలిపారు.