Manipur Violence | ఇంఫాల్, జూలై 27: ‘రాత్రంతా కాల్పులు జరుగుతూనే ఉన్నాయి. బుల్లెట్ల శబ్దాలు వినిపిస్తూనే ఉన్నాయి. భయంతో నిద్ర పట్టలేదు. రాత్రి నుంచి ఏమీ తినలేదు’ మణిపూర్లో తాజా పరిస్థితి గురించి బిష్ణుపూర్ జిల్లాలోని మోయిరాంగ్ గ్రామ వాసి చేసిన వ్యాఖ్యలివి. మణిపూర్లో తాజా పరిస్థితులకు ఆయన వ్యాఖ్యలు అద్దం పడుతున్నాయి. మహిళలపై దారుణ ఘటన వెలుగు చూసినప్పటికీ బీజేపీ పాలిత కేంద్ర, రాష్ట్ర ప్రభుత్వాలు శాంతిని నెలకొల్పేందుకు కనీస ప్రయత్నాలు చేయడం లేదనడానికి ఈ ఘటనే ఉదాహరణగా నిలుస్తున్నది.
మణిపూర్లో హింసాత్మక ఘటనలు మరోసారి చోటుచేసుకున్నాయి. బిష్ణుపూర్ జిల్లాలో గురువారం ఇరు వర్గాల మధ్య కాల్పులు జరిగాయి. రెండు గ్రూపులకు చెందిన కొంతమంది మిలిటెంట్లు ఒకరిపై మరొకరు విచక్షణారహితంగా కాల్పులకు తెగబడ్డారు. విషయం తెలుసుకున్న పోలీసులు వెంటనే అక్కడికి చేరుకొని మిలిటెంట్లను చెదరగొట్టారు. రాష్ట్ర రాజధాని ఇంఫాల్కు 50 కి.మీ దూరంలోని ఫౌబాక్చావో ఇకాయి ప్రాంతంలో ఈ ఘటన జరిగింది. కాల్పుల్లో భాగంగా మిలిటెంట్లు ఓ ఇంటిని తగలబెట్టారు. దీంతో స్థానికులు తమ ఇండ్లను విడిచిపెట్టి సమీపంలోని పునరావాస కేంద్రాలకు తరలివెళ్లారు.
భావ వ్యక్తీకరణపై క్రిమినల్ కేసులా?
భావ వ్యక్తీకరణ చేసే స్వేచ్ఛ దేశ పౌరులకు లేదా? అభిప్రాయాలు వ్యక్తం చేసినందుకే క్రిమినల్ కేసులు పెడతారా? అంటూ మేధావి వర్గం మండిపడింది. మణిపూర్లో ప్రస్తుతం జరుగుతున్న తీవ్ర విధ్వంస పరిస్థితులపై తన అభిప్రాయాలను వ్యక్తం చేసిన యూనివర్సిటీ ఆఫ్ హైదరాబాద్లో పొలిటికల్ సైన్స్ ప్రొఫెసర్ ఖామ్ ఖాన్ సుయాన్ హాసింగ్పై క్రిమినల్ కేసు పెట్టడాన్ని దేశ, విదేశాలకు చెందిన 32 మంది విద్యావేత్తలు, మేధావులు తీవ్రంగా ఖండిస్తూ ఆయనకు సంఘీభావాన్ని ప్రకటించారు. ఆయనకు మద్దతుగా వారు ప్రకటన చేస్తూ ఇది రాజ్యాంగం కల్పించిన వాక్స్వాతంత్య్ర హక్కును హరించే ప్రయత్నమేనని వ్యాఖ్యానించారు.
ఇటీవల మణిపూర్లో చోటుచేసుకున్న అకృత్యాలపై ప్రొఫెసర్ హాసింగ్ ‘వైర్’కు ఇచ్చిన ఇంటర్వ్యూలో పలు అభిప్రాయాలను వ్యక్తం చేశారు. ఆయన వ్యాఖ్యలు తమ మనోభావాలను దెబ్బతీయడమే కాక ఒక వర్గం వారికి అనుకూలంగా ఉన్నాయని ఆషెం తరుణకుమారి దేవీమైతీ ట్రైబ్స్ యూనియన్ (ఎంటీయూ) సభ్యుడు మణిహార్ మొయిరంగథమ్ సింగ్ ఫిర్యాదు చేయడంతో హాసంగ్కు ఈ నెల 6న ఇంఫాల్ తూర్పు జిల్లా కోర్టు చీఫ్ జ్యుడీషియల్ మేజిస్ట్రేట్ సమన్లు జారీ చేశారు. హాసంగ్ చేసిన వ్యాఖ్యలపై కొందరు వ్యక్తులు క్రిమినల్ కేసు దాఖలు చేయడం దురదృష్టకరమని, ఇది చాలా ప్రమాదకర ధోరణని వారు వ్యాఖ్యానించారు.