టీకా మిస్ అయినా వ్యాక్సినేష‌న్ స‌ర్టిఫికెట్!

ముంబై : కొవిన్ పోర్ట‌ల్‌లో లోటుపాట్లు బ‌హిర్గ‌తమవుతున్నాయి. కరోనా వ్యాక్సిన్ వేయించుకోని ముంబై విరార్ ప్రాంతానికి చెందిన ఓ వ్య‌క్తికి కొవిన్ ప్లాట్‌ఫాం నుంచి వ్యాక్సినేష‌న్ స‌ర్టిఫికెట్ వ‌చ్చింది. కొవిన్ యాప్‌లో వ్యాక్సిన్ స్లాట్ బుక్ చేసుకున్న నిలేష్ మేస్త్రీ అనే వ్య‌క్తి వేరే ప‌నులు ఉండ‌టంతో వ్యాక్సిన్ కేంద్రానికి వెళ్లలేదు. ఇప్పుడు ఏకంగా వ్యాక్సినేష‌న్ స‌ర్టిఫికెట్ రావ‌డంతో త‌న‌కు వ్యాక్సిన్ వేస్తారో లేదో అని ఆయ‌న భ‌య‌ప‌డుతున్నాడు. వ్యాక్సిన్ వేయించుకోకుండానే వ్యాక్సినేష‌న్ స‌ర్టిపికెట్ రావ‌డంతో మేస్త్రీ చార్కోప్ పోలీసుల‌కు ఇదే విష‌య‌మై ఫిర్యాదు చేశాడు.

పోలీసులు తెలిపిన వివ‌రాల ప్ర‌కారం నిలేష్ మేస్త్రీ జులై 15న ఖండివ‌లిలోని చ‌వాన్ ఆస్ప‌త్రిలో కొవిన్ యాప్ ద్వారా వ్యాక్సిన్‌ స్లాట్ బుక్ చేసుకున్నాడు. తాను అపాయింట్‌మెంట్‌ను మిస్ చేసినా ఆన్‌లైన్‌లో స‌ర్టిఫికెట్ జ‌న‌రేట్ అయింద‌ని మేస్త్రీ వాపోయాడు. ఇక మేస్త్రి అస‌లు ఆస్ప‌త్రికే వెళ్ల‌లేద‌ని, అయినా వ్యాక్సిన్ స‌ర్టిఫికెట్‌పై అత‌డి వివ‌రాలు ఎలా వ‌చ్చాయ‌ని ఎంఎన్ఎస్ కార్య‌క‌ర్త దినేష్ సాల్వి ప్ర‌శ్నించారు. దీనిపై బాధితుడితో ఆయ‌న పోలీస్ స్టేష‌న్‌లో ఫిర్యాదు చేయించారు.