న్యూఢిల్లీ: ఇండియాలో డెల్టా వేరియంట్ ప్రబలుతున్న సమయంలో.. కోవీషీల్డ్ వ్యాక్సిన్ సమర్ధవంతంగా పనిచేసినట్లు ద లాన్సెట్ జర్నల్ ఓ నివేదికను ప్రచురించింది. మధ్య స్థాయి నుంచి తీవ్ర స్థాయి కోవిడ్ లక్షణాలు ఉన్న వారి పట్ల కోవీషీల్డ్ మెరుగ్గా పనిచేసినట్లు ఆ స్టడీలో తేల్చారు. సార్స్ సీవోవీ2కు చెందిన డెల్టా వేరియంట్ ఏప్రిల్ నుంచి మే మధ్య కాలంలో ఇండియాలో పెను విషాదాన్ని మిగిల్చిన విషయం తెలిసిందే. అయితే ఆ సమయంలో కోవీషీల్డ్ టీకా ఎలా పనిచేస్తుందో అధ్యయనం చేశారు. రెండు డోసుల టీకా తీసుకున్నవారిలో.. కోవీషీల్డ్ వ్యాక్సిన్ సమర్ధత 63 శాతం ఉన్నట్లు ద లాన్సెట్ తన స్టడీలో తెలిపింది. ఇక మధ్యస్థాయి నుంచి తీవ్ర స్థాయి వ్యాధి ఉన్నప్పుడు వ్యాక్సిన్ సమర్ధత 81 శాతంగా ఉన్నట్లు లాన్సెట్ తన రిపోర్ట్లో తెలిపింది. కోవీషీల్డ్ వ్యాక్సిన్ను సీరం సంస్థ ఉత్పత్తి చేస్తున్న విషయం తెలిసిందే.