Dolo 650 | క్యాడ్‌బరీ జెమ్స్‌లా డోలో 650 వాడేస్తున్నరు.. భారతీయుల తీరుపై డాక్టర్‌ వ్యాఖ్య.. వైరల్‌

భారతీయులు డోలో 650 మాత్రలను క్యాడ్‌బరీ జెమ్స్‌లా తినేస్తున్నారని గ్యాస్ట్రోఎంటరాలజిస్ట్‌, హెల్త్‌ ఎడ్యుకేటర్‌ పలనియప్పన్‌ మానిక్కం సామాజిక మాధ్యమంలో వ్యాఖ్యానించారు. ఇది వైరల్‌గా మారింది. తమ ఇంటిలోనూ ఇదే పరిస్థితి అని చాలా మంది కామెంట్లు పెట్టారు.

Dolo 650 | న్యూఢిల్లీ: భారతీయులు డోలో 650 మాత్రలను క్యాడ్‌బరీ జెమ్స్‌లా తినేస్తున్నారని గ్యాస్ట్రోఎంటరాలజిస్ట్‌, హెల్త్‌ ఎడ్యుకేటర్‌ పలనియప్పన్‌ మానిక్కం సామాజిక మాధ్యమంలో వ్యాఖ్యానించారు. ఇది వైరల్‌గా మారింది. తమ ఇంటిలోనూ ఇదే పరిస్థితి అని చాలా మంది కామెంట్లు పెట్టారు. కొవిడ్‌-19 మహమ్మారి వచ్చినప్పటి నుంచి ఈ మాత్రల వాడకం పెరిగింది.  జ్వరం, తలనొప్పి, ఒళ్లు నొప్పులు తగ్గడానికి వైద్యులు దీనిని సూచిస్తారు. అయితే ఇందులోని పారాసిటమాల్‌తో కిడ్నీ, కాలేయం దెబ్బతింటాయి.

వైద్యులు సూచించిన మోతాదులోనే వాడాలి. కొవిడ్‌-19 మహమ్మారి సమయంలో టీకాలను తీసుకున్న తర్వాత సైడ్‌ ఎఫెక్ట్స్‌ను ఎదుర్కొనడం కోసం పారాసిటమాల్‌ను వాడాలని వైద్యులు చెప్పేవారు. 2020లో మైక్రో ల్యాబ్స్‌ 350 కోట్లకుపైగా డోలో 650 మాత్రలను విక్రయించి, ఓ సంవత్సరంలోనే రూ.400 కోట్లు సంపాదించింది. మార్కెట్‌ పరిశోధన సంస్థ ఐక్యూవీఐఏ వెల్లడించిన వివరాల ప్రకారం, ఈ మహమ్మారి రావడానికి ముందు మైక్రో ల్యాబ్స్‌ ఏటా 7.5 కోట్ల డోలో 650 స్ట్రిప్‌లను విక్రయించేది. 2021 చివరినాటికి 14.5 కోట్ల స్ట్రిప్స్‌ను విక్రయించింది.