భారత శాస్త్రవేత్త అశోక్‌సేన్‌కు ఆస్కార్‌ క్లెయిన్‌

భౌతికశాస్త్రంలో విశేష పరిశోధనలు చేసిన వారికి ఇచ్చే ఆస్కార్‌ క్లెయిన్‌-2026 పురస్కారం అశోక్‌సేన్‌కు దక్కింది.

• భౌతికశాస్త్రంలో విశేష సేవలు

న్యూఢిల్లీ : భారతీయ శాస్త్రవేత్త అశోక్‌సేన్‌కు ప్రపంచ స్థాయిలో అరుదైన గుర్తింపు లభించింది. భౌతికశాస్త్రంలో విశేష పరిశోధనలు చేసిన వారికి ఇచ్చే ఆస్కార్‌ క్లెయిన్‌-2026 పురస్కారం అశోక్‌సేన్‌కు దక్కింది. ఈ పురస్కారం అందుకున్న తొలి భారతీయ శాస్త్రవేత్తగా సేన్‌ రికార్డు సృష్టించారు.

స్ట్రింగ్‌ థియరీ, స్ట్రింగ్‌ ఫీల్డ్‌ థియరీ, కృష్ణబిలాల ఎంట్రోపీ లాంటి అంశాలపై చేసిన పరిశోధనలకు గాను ఆయనకు ఈ అవార్డు అందించారు. స్ట్రింగ్‌ థియరీలో అశోక్‌సేన్‌ చేసిన పరిశోధనలకు గాను ప్రపంచ వ్యాప్తంగా గుర్తింపు ఉంది. కలకత్తా యూనివర్సిటీలో చదువుకున్న సేన్‌.. ప్రస్తుతం బెంగుళూరులో ఉన్న ఇంటర్నేషనల్‌ సెంటర్‌ ఫర్‌ థియరెటికల్‌ సైన్సెస్‌లో ప్రొఫెసర్‌గా చేస్తున్నారు. ఆయన చేసిన పరిశోధనలకు గాను 2001లో పద్మశ్రీ అవార్డు, 2013లో పద్మభూషణ్‌ అవార్డు అందుకున్నారు.