IMD | చల్లని కబురు చెప్పిన వాతావరణ శాఖ.. ముందుగానే రుతుపవనాలు..!

IMD | భారత వాతావరణ శాఖ (IMD) తీపికబురు చెప్పింది. రాబోయే వానాకాలం సీజన్‌లో వర్షాలు సంవృద్ధిగా కురుస్తాయని వెల్లడించింది. ఎల్‌నినో పరిస్థితులు పూర్తిగా తొలగిపోయి.. లా నినా పరిస్థితులు కనిపిస్తున్నాయని పేర్కొంది.

IMD | భారత వాతావరణ శాఖ (IMD) తీపికబురు చెప్పింది. రాబోయే వానాకాలం సీజన్‌లో వర్షాలు సంవృద్ధిగా కురుస్తాయని వెల్లడించింది. ఎల్‌నినో పరిస్థితులు పూర్తిగా తొలగిపోయి.. లా నినా పరిస్థితులు కనిపిస్తున్నాయని.. హిందూ మహాసముద్ర ద్విధ్రువ (IDO) పరిస్థితులతోపాటు లానినా పరిస్థితులు ఏకకాలంలో యాక్టివ్ మారుతుండడంతో రుతుపవనాలు ముందుగానే వచ్చే అవకాశాలున్నాయని అంచనా వేసింది. ప్రస్తుతం దేశవ్యాప్తంగా వివిధ ప్రాంతాల్లో ఎండలు దంచికొడుతున్నాయి.

ఇప్పటికే పలుచోట్ల కర్ణాటకతో పాటు పలు రాష్ట్రాల్లో మంచినీటికి తీవ్ర ఇబ్బందులు ఎదురవుతున్నాయి. ఈ క్రమంలో రాబోయే వర్షాకాలం సీజన్‌లోనైనా వర్షాలు కురుస్తాయనే ఆశలున్నాయి. రుతుపవనాల అల్పపీడనాలు పశ్చిమ, వాయవ్య భారతదేశం, ఉత్తర అరేబియా సముద్రంవైపు విస్తరించి స్థిరమైన పంథాను అనుసరిస్తాయని ఐఎండీ భావిస్తున్నది. ఫలితంగా ఆయా ప్రాంతాల్లో వర్షపాతం పెరుగుతుందని.. సాధారణ వర్షపాతానికి మించి వర్షాలు కురిసే అవకాశం ఉందని అంచనా వేస్తున్నది.

లా నినా.. ఎల్‌ నినో అంటే..?

అయితే, లా నినాతో పసిఫిక్ మహాసముద్రంపై భూమధ్యరేఖ వెంట వీచే గాలులు.. అంటే తూర్పున దక్షిణ అమెరికా నుంచి పశ్చిమాన ఆసియా వైపు వీచే గాలులు సాధారణం కంటే బలంగా ఉంటాయి. ఈ గాలులు దక్షిణ అమెరికా నుంచి ఆసియా వైపుకు వెచ్చటి నీటిని తీసుకొస్తాయి. దాంతో సముద్రమట్టాలు పెరుగుతాయి. అమెరికా వైపు చల్లటి నీరు ఉపరితలంపైకి వస్తుంది. ఎల్‌ నినో దశలో పూర్తిగా దీనికి వ్యతిరేకంగా జరుగుతుంది. వెచ్చటి నీరు అమెరికా వైపుకు చేరుతుంది. ఆసియా వైపు చల్లటి నీరు సముద్ర ఉపరితలం మీదకు వస్తుంది. ఎల్ నినో.. లా నినో దశలు ఒకేలా ఉండవు.

వాటిలో కొన్ని కామన్‌గా ఉంటాయి. ఎల్ నినో దశలో వెచ్చటి నీరు మరింతగా వ్యాపిస్తుంది. ఉపరితలానికి దగ్గరగా ఉంటుంది. ఇది వాతావరణంలోకి మరింత వేడిని విడుదల చేస్తుంది. దాంతో తేమ, వెచ్చని గాలులు పెరుగుతాయి. ఎల్ నినో సమయంలో సముద్రంలో వెచ్చటి నీరు తూర్పు వైపుకూ, దక్షిణం వైపుకూ ప్రవహిస్తుంది. దక్షిణ అమెరికా, గల్ఫ్ ఆఫ్ మెక్సికో ప్రాంతాలలో వర్షాలు పడతాయి. ఉత్తర అమెరికా, కెనడా ప్రాంతాలు పొడిగానే ఉంటాయి. ఆసియా, ఆస్ట్రేలియా, మధ్య, దక్షిణ ఆఫ్రికాలలో వర్షాలు లేక.. కరువు పరిస్థితులు ఏర్పడుతాయి. లా నినా ఉన్నప్పుడు దీని విరుద్ధంగా జరుగుతుంది. దక్షిణ అమెరికా, కెనడా, ఆసియాలలో భారీ వర్షాలు పడే అవకాశాలుంటాయి.