న్యూఢిల్లీ, డిసెంబర్ 12: అంతర్జాతీయ సూచికలో హైదరాబాద్ మరోసారి సత్తా చాటింది. గత 10 ఏండ్లుగా స్థిరమైన పాలన, ప్రశాంత రాజకీయ వాతావరణం ఫలితంగా హైదరాబాద్ నగరంలో జీవన నాణ్యత మెరుగుపడిందని ‘మెర్సర్స్ క్వాలిటీ ఆఫ్ ఇండెక్స్’ తాజా నివేదిక (2023) కుండబద్దలు కొట్టింది. మెర్సర్స్ వరల్డ్వైడ్ క్వాలిటీ ఆఫ్ లివింగ్ (జీవన నాణ్యత) తాజా ర్యాంకింగ్స్లో భారత్ నుంచి హైదరాబాద్కు అత్యుత్తమ ర్యాంక్ దక్కింది.
బెంగళూరు, పుణే వంటి నగరాలను భాగ్యనగరం వెనక్కి నెట్టింది. ప్రపంచవ్యాప్తంగా హైదరాబాద్ 153వ స్థానంలో నిలువగా, పుణెకు 154, బెంగళూరుకు 156 ర్యాంకులు దక్కాయి. చెన్నై(161), ముంబై (164), కోల్కతా (170), న్యూఢిల్లీ (172) నగరాలు ఆ తర్వాత స్థానాల్లో నిలిచాయి. ప్రపంచవ్యాప్తంగా వివిధ నగరాల్లో విదేశీ ఉద్యోగులు, ప్రవాసులు, వారి కుటుంబాల రోజువారీ జీవనం.. వాస్తవ పరిస్థితుల ఆధారంగా ‘మెర్సర్స్’ ఈ ర్యాంకుల్ని విడుదల చేసింది.
ఈ ర్యాంకింగ్స్లో భారత దేశానికి చెందిన 7 నగరాలు మాత్రమే చోటు దక్కించుకోగా, అందులో హైదరాబాద్ అగ్రస్థానంలో నిలవటం విశేషం. వివిధ దేశాలకు చెందిన ఉద్యోగులు, వారి కుటుంబాలకు అత్యంత నాణ్యతతో కూడిన జీవన పరిస్థితులు హైదరాబాద్ నగరంలో ఉన్నాయన్న సంగతి ‘మెర్సర్స్ ఇండెక్స్’ గణాంకాలతో సహా చూపుతున్నది. ఆర్థిక పరిస్థితులు, రాజకీయ హింస లేకపోవటం, సామాజిక సమానత్వం.. వంటివి ర్యాంకింగ్స్లో పరిగణనలోకి తీసుకోగా, భారత్లో మిగతా అన్ని నగరాలకన్నా హైదరాబాద్ మెరుగైన స్థానంలో నిలిచింది.
మొదటి స్థానంలో వియన్నా
తాజా ర్యాంకింగ్స్లో ఆస్ట్రియా రాజధాని వియన్నా ప్రపంచంలోనే మొదటి స్థానాన్ని కైవసం చేసుకుంది. జాబితాలో జ్యూరిచ్ (స్విట్జర్లాండ్), అక్లాండ్ (న్యూజిలాండ్) నగరాలు తర్వాతి స్థానాల్లో నిలిచాయి. అత్యంత దారుణమైన జీవన పరిస్థితులు నెలకొన్న ఆఫ్రికా నగరాలైన ఎన్జామినా(చాద్)- 236, బాంగు(సెంట్రల్ ఆఫ్రికన్ రిపబ్లిక్)- 239, ఖర్తోమ్ (సూడాన్)-241 సూచికలో అట్టడుగున నిలిచాయి. ప్రపంచంలో ప్రసిద్ధి చెందిన నగరాలైన సింగపూర్-29, న్యూయార్క్-40, లండన్-45, దుబాయ్-79, టోక్యో-50, అబుదాబీ-84, షాంఘై-109, బీజింగ్-126వ ర్యాంకులు దక్కించుకున్నాయి.
నగరం : ర్యాంకు
హైదరాబాద్ : 153
పుణె : 154
బెంగళూరు : 156
చెన్నై : 161
ముంబై : 164
కోల్కతా : 170
న్యూఢిల్లీ : 172