Hindi Language : అధికార భాషగా హిందీకి 72 ఏండ్లు

Hindi Language : దేశవ్యాప్తంగా ఎక్కువ మంది మాట్లాడే భాష హిందీ. కేంద్ర ప్రభుత్వం హిందీని అధికార భాషగా ప్రకటించి సరిగ్గా నేటికి 72 ఏండ్లు...

September 14, 2021 / 12:58 PM IST

Hindi Language : అధికార భాషగా హిందీకి 72 ఏండ్లు

దేశవ్యాప్తంగా ఎక్కువ మంది మాట్లాడే భాష హిందీ. కేంద్ర ప్రభుత్వం హిందీని అధికార భాషగా (Hindi Language) ప్రకటించి సరిగ్గా నేటికి 72 ఏండ్లు పూర్తయ్యాయి. ఏటా సెప్టెంబర్‌ 14 న హిందీ దినోత్సవంగా జరుపుకోవాలని కేంద్రం ప్రకటించింది. సంస్కృతం ప్రపంచంలోని తొలి భాషగా పరిగణిస్తుంటారు. అయితే, హిందీ 2550 ఏండ్ల క్రితం ప్రారంభమైనట్లుగా చెప్తుంటారు. 120 ఏండ్లుగా చాలా వేగంగా వ్యాప్తిచెందింది. ప్రపంచంలో అత్యంత అర్ధమయ్యే భాషగా మారింది.

భారతదేశానికి స్వాతంత్య్రం సిద్ధించిన సమయంలో అనేక పెద్ద సమస్యలు వచ్చాయి. వీటిలో భాషా సమస్య ఒకటి. భారతదేశంలో వందల భాషలు, మాండలికాలు మాట్లాడేవారు. అలాంటి పరిస్థితిలో అధికారిక భాషగా దేనిని నిర్ణయించాలనేది పెద్ద సవాలుగా ఉన్నది. సుదీర్ఘ చర్చ తర్వాత, రాజ్యాంగ పరిషత్ సెప్టెంబర్ 14 న హిందీని భారతదేశ అధికారిక భాషగా నిర్ణయించింది. ఇది రాజ్యాంగంలోని ఆర్టికల్ 343 (1) లో పేర్కొన్నారు. దీని ప్రకారం, భారతదేశ అధికారిక భాష ‘హిందీ’ స్క్రిప్ట్ ‘దేవనాగరి’. 1953 నుంచి హిందీ ప్రచారం కోసం ఏటా సెప్టెంబర్ 14 న హిందీ దివాస్‌ను నిర్వహిస్తున్నారు.

అయితే, హిందీని అధికార భాషగా ఎంచుకున్న తర్వాత హిందీయేతర రాష్ట్రాల్లో నిరసనలు పెల్లుబికాయి. ముఖ్యంగా దక్షిణాది రాష్ట్రాల నుంచి తీవ్ర వ్యతిరేకత వచ్చింది. 1963 లో అధికారిక భాషా చట్టాన్ని తీసుకురావడంతో ఏ భాషలోనైనా అధికారిక పనులు చేసే హక్కు రాష్ట్రాలకు ఇవ్వబడింది. ప్రస్తుతం, దేశంలో 22 భాషలకు అధికారిక భాష హోదా లభించింది. ప్రస్తుతం ప్రపంచంలో అత్యధికంగా మాట్లాడే మూడవ భాషగా హిందీ నిలిచింది. మన దేశంలో 77 శాతం మంది హిందీ మాట్లాడతారు. అర్థం చేసుకుంటారు. చదువుతారు.