చండీగఢ్: తాను బీజేపీలోనే ఉన్నానని హర్యానాకు చెందిన సీనియర్ బీజేపీ నాయకుడు అనిల్ విజ్ (Anil Vij) తెలిపారు. బీజేపీ భక్తుడినన్న ఆయన, పార్టీ కోసం పని చేస్తానని చెప్పారు. హర్యానా సీఎం మార్పు నేపథ్యంలో ఆ పదవి ఆశించిన అనిల్ విజ్ పార్టీ అధిష్టానం నిర్ణయంపై అసంతృప్తి వ్యక్తం చేశారు. కొత్త సీఎంగా నయాబ్ సైనీని ఎన్నుకోవడంతో బీజేపీ లెజిస్లేచర్ పార్టీ మీటింగ్ నుంచి అనిల్ విజ్ వాకౌట్ చేశారు. మీటింగ్లో ఏం జరిగిందని మీడియా ప్రశ్నించగా ఢిల్లీ నుంచి వచ్చిన నేతలు చెబుతారంటూ అక్కడి నుంచి వెళ్లిపోయారు.
కాగా, సీఎంగా నయాబ్ సైనీ ప్రమాణ స్వీకార కార్యక్రమానికి కూడా అనిల్ విజ్ హాజరుకాలేదు. అయితే ఒక రోజు తర్వాత ఆయన కొంత శాంతించారు. తాను ఇప్పటికీ బీజేపీలో ఉన్నానని స్పష్టం చేశారు. ‘నేను బీజేపీ భక్తుడ్ని. పరిస్థితులు మారవచ్చు కానీ నేను పార్టీ కోసం పని చేస్తూనే ఉంటా’ అని అన్నారు.
మరోవైపు 2014లో హర్యానాలో సొంత బలంతో బీజేపీ అధికారంలోకి వచ్చిన తర్వాత ముఖ్యమంత్రి పదవి రేస్లో అనిల్ విజ్ ఉన్నారు. అయితే తొలిసారి ఎమ్మెల్యేగా ఎన్నికైన మనోహర్ లాల్ ఖట్టర్ను సీఎంగా బీజేపీ అధిష్టానం ఎంపిక చేసింది. దీంతో అనిల్ విజ్ నాడు కూడా పార్టీ నిర్ణయంపై అసంతృప్తి వ్యక్తం చేశారు.