Haryana: భూవివాదం.. అయిదుగురు కుటుంబ‌ స‌భ్యుల్ని గొంతుకోసి చంపిన మాజీ సైనికుడు

Haryana: ఓ మాజీ సైనికుడు.. త‌న కుటుంబానికి చెందిన అయిదుగుర్ని గొంతుకోసి చంపాడు. ఈ ఘ‌ట‌న హ‌ర్యానాలో జ‌రిగింది. రెండు ఎక‌రాల భూమి కోసం అత‌ను ఆ హ‌త్య‌ల‌కు పాల్ప‌డిన‌ట్లు తెలుస్తోంది.

అంబాలా: హ‌ర్యానా(Haryana)లోని నారాయ‌ణ్‌ఘ‌ర్‌లో దారుణం జ‌రిగింది. రాతౌర్ గ్రామంలో ఓ మాజీ సైనికుడు .. అయిదుగురు కుటుంబ‌స‌భ్యుల‌ను చంపేశాడు. ఆదివారం రాత్రి ఆ మాజీ సైనికుడు.. ప‌దునైన ఆయుధంతో గొంతు గోసి మ‌రీ హ‌త్య చేశాడు. ప్రాణాలు కోల్పోయిన వారిలో ఆ సైనికుడి త‌ల్లి, సోద‌రుడు, వ‌దిన‌, ఇద్ద‌రు చిన్నారులు ఉన్నారు. నిందితుడు భూష‌ణ్‌.. తండ్రి ఓం ప్ర‌కాశ్‌పై కూడా అటాక్ చేశాడు. సోద‌రుడికి చెందిన మ‌రో కూతురిపై కూడా దాడి చేశాడు.

గాయ‌ప‌డ్డ‌వారిని నారాయ‌ణ్‌ఘ‌ర్‌లోని స‌విల్ ఆస్ప‌త్రిలో చేర్పించారు. బాధిత వ్య‌క్తి కూతురికి.. చండీఘ‌డ్‌లోని జీఎంసీహెచ్ ఆస్ప‌త్రిలో చికిత్స అందిస్తున్నారు. కుటుంబ‌స‌భ్యుల్ని చంపిన త‌ర్వాత‌.. ఆ మృత‌దేహాల‌ను ర‌హ‌స్యంగా ద‌హ‌నం చేయాల‌ని నిందితుడు ప్ర‌య‌త్నించాడు. అయితే పోలీసులు ఆ ప్రాంతాన్ని వెళ్లి, స‌గం కాలిన మృత‌దేహాల‌ను రిక‌వ‌రీ చేశారు. రిటైర్డ్ సైనికుడు అక్క‌డ నుంచి పారిపోయే ప్ర‌య‌త్నం చేయ‌గా, పోలీసులు అత‌న్ని రౌండ‌ప్ చేశారు.

స‌మాచారం అందుకున్న ఎస్పీ సురేంద్ర సింగ్ భౌరియా.. ఆ స్పాట్‌కు తెల్ల‌వారుజామున 3 గంట‌ల‌కు చేరుకున్నాడు. ఈ కేసులో ద‌ర్యాప్తు మొద‌లుపెట్టారు. సగం కాలిన మృత‌దేహాల‌ను అంబాలా కంటోన్మెంట్ ఆస్ప‌త్రికి త‌ర‌లించారు. అక్క‌డ పోస్టుమార్ట‌మ్ నిర్వ‌హిస్తున్నారు. రెండు ఎక‌రాల స్థ‌లం వివాదం నేప‌థ్యంలో అటాక్ జ‌రిగిన‌ట్లు నిందితుడి తండ్రి ఓం ప్ర‌కాశ్ తెలిపాడు.

బాధితుల్లో 35 ఏళ్ల హ‌రీశ్‌, 32 ఏళ్ల సోనియా, 65 ఏళ్ల స‌రోపి, అయిదేళ్ల అమ్మాయి, ఆర్నెల్ల పిల్లోడు ఉన్నాడు.