DMK | సీఈసీని వెంట‌నే తొల‌గించాలి.. డీఎంకే తీర్మానం..!

DMK | త‌మిళ‌నాడు (Tamil Nadu) లోని ప్ర‌తిప‌క్ష డీఎంకే పార్టీ (DMK Party) కేంద్ర ఎన్నికల సంఘం (Centrel Election Commission) పై, ఎన్నికల ప్రక్రియపై తీవ్ర అసంతృప్తి వెళ్ల‌గ‌క్కింది. సీఈసీ జ్ఞానేశ్ కుమార్‌ (CEC Gyanesh Kumar) ను వెంట‌నే పదవి నుంచి తొలగించాలని, ఈవీఎం (EVM) ల‌ స్థానంలో తిరిగి బ్యాలెట్ విధానాన్నే ప్రవేశపెట్టాలని ఆ పార్టీ ఎంపీలు డిమాండ్ చేశారు.

DMK : త‌మిళ‌నాడు (Tamil Nadu) లోని ప్ర‌తిప‌క్ష డీఎంకే పార్టీ (DMK Party) కేంద్ర ఎన్నికల సంఘం (Centrel Election Commission) పై, ఎన్నికల ప్రక్రియపై తీవ్ర అసంతృప్తి వెళ్ల‌గ‌క్కింది. సీఈసీ జ్ఞానేశ్ కుమార్‌ (CEC Gyanesh Kumar) ను వెంట‌నే పదవి నుంచి తొలగించాలని, ఈవీఎం (EVM) ల‌ స్థానంలో తిరిగి బ్యాలెట్ విధానాన్నే ప్రవేశపెట్టాలని ఆ పార్టీ ఎంపీలు డిమాండ్ చేశారు. ఓటర్ల జాబితా (Voters list) ప్రత్యేక స‌మ‌గ్ర‌ సవరణ (SIR) కార్యక్రమాన్ని పూర్తిగా రద్దు చేయాలని కూడా తీర్మానించారు.

ఇవాళ (శ‌నివారం) ఉదయం 11 గంటలకు చెన్నైలోని పార్టీ ప్రధాన కార్యాలయం అన్నా అరివాలయంలో డీఎంకే అధినేత, తమిళనాడు మాజీ ముఖ్యమంత్రి ఎంకే స్టాలిన్ అధ్యక్షతన పార్టీ పార్లమెంటరీ సభ్యుల సమావేశం జరిగింది. ఈ సమావేశంలో మొత్తం నాలుగు కీలక తీర్మానాలను ఆమోదించారు. ఎన్నికల ప్రక్రియలో అవకతవకలు జరుగుతున్నాయని, వాటిని సరిదిద్దేందుకు చర్యలు తీసుకోవాలని కోరుతూ భారత రాష్ట్రపతికి వినతిపత్రం సమర్పించాలనేది వాటిలో ఒక‌టి.

సీఈసీ జ్ఞానేశ్ కుమార్‌ను వెంట‌నే తొలగించాల‌నేది వాటిలో తొలి తీర్మానంగా ఉన్న‌ది. ఎన్నికల నిర్వహణలో ఆయన వైఫల్యం చెందారని ఆరోపిస్తూ.. ఆయ‌న‌ను వెంట‌నే తొల‌గించాల‌ని ఆ తీర్మానంలో డిమాండ్ చేశారు. అయితే ఎలాంటి అవ‌క‌త‌వ‌క‌లు జ‌రిగాయ‌నేది మాత్రం పార్టీ విడుదల చేసిన ప్రకటనలో స్పష్టంగా పేర్కొనలేదు. అయితే రాష్ట్రపతికి సమర్పించే వినతిపత్రంలో పూర్తి వివరాలు పొందుపరచనున్నట్లు తెలుస్తున్న‌ది.

విద్యార్థి సంఘాలు నిర్వహిస్తున్న నిరసనలకు మ‌ద్ద‌తు తెలుపుతూ డీఎంకే మ‌రో తీర్మానం చేసింది. అయితే ఏ విద్యార్థి సంఘాల‌కు వారు మ‌ద్ద‌తిస్తున్నారో స్ప‌ష్టంగా తెలియ‌జేయ‌లేదు. ఇక‌ కాంగ్రెస్, అధికార టీవీకే పార్టీల ద్వంద్వ వైఖరిని ఖండిస్తూ మూడో తీర్మానం చేసింది. ఏయే అంశాల్లో ఈ పార్టీలు ద్వంద్వ ప్రమాణాలు పాటిస్తున్నాయో కూడా తీర్మానంలో వివరించలేదు. ఎన్నిక‌ల ప్ర‌క్రియ‌లో సంస్క‌ర‌ణ‌లు తీసుకురావాల‌ని రాష్ట్ర‌ప‌తిని కోరుతూ నాలుగో తీర్మానం చేశారు.