Pak’s Toxic Fairness Cream | నిషేధం ఉన్నప్పటికీ.. మహారాష్ట్ర, మధ్యప్రదేశ్‌లో పాక్‌ విషపూరిత క్రీమ్‌ అమ్మకాలు

Pak's Toxic Fairness Cream | భారత్, పాకిస్థాన్‌ మధ్య వాణిజ్య సంబంధాలు నిలిచిపోయాయి. అయినప్పటికీ పాక్‌కు చెందిన విషపూరిత ఫెయిర్‌నెస్ క్రీమ్ భారత మార్కెట్లను ముంచెత్తుతున్నది. మహారాష్ట్ర, మధ్యప్రదేశ్‌తో పాటు దేశంలోని అనేక ప్రాంతాలలో ఈ క్రీమ్‌ అమ్మకాలు నిరాటంకంగా కొనసాగుతున్నాయి. వాడిన పలువురు మహిళలు కిడ్నీ వంటి ప్రాణాంతక వ్యాధులకు గురవుతున్నారు.

న్యూఢిల్లీ: భారత్, పాకిస్థాన్‌ మధ్య వాణిజ్య సంబంధాలు నిలిచిపోయాయి. అయినప్పటికీ పాక్‌కు చెందిన విషపూరిత ఫెయిర్‌నెస్ క్రీమ్ భారత మార్కెట్లను ముంచెత్తుతున్నది. మహారాష్ట్ర, మధ్యప్రదేశ్‌తో పాటు దేశంలోని అనేక ప్రాంతాలలో ఈ క్రీమ్‌ అమ్మకాలు నిరాటంకంగా కొనసాగుతున్నాయి. ఇది వాడిన పలువురు మహిళలు కిడ్నీ వంటి ప్రాణాంతక వ్యాధులకు గురవుతున్నారు. (Pak’s Toxic Fairness Cream) పాకిస్థాన్‌ తయారీ ‘గోరీ బ్యూటీ క్రీమ్’ భారత మార్కెట్లలో విపరీతంగా అమ్ముడవుతున్నది. రూ.380 నుంచి రూ.800 మధ్య ధర ఉన్న ఈ ఫెయిర్‌నెస్ క్రీమ్ అన్ని ఆన్‌లైన్ ప్లాట్‌ఫారమ్‌లలో కూడా అందుబాటులో ఉన్నది.

కాగా, పాకిస్థాన్‌కు చెందిన ఈ ఫెయిర్‌నెస్‌ క్రీమ్‌లో పాదరసం, సీసం వంటి విషపూరిత లోహాలు ఉన్నట్లు
ల్యాబ్ పరీక్షలో నిర్ధారణ అయ్యింది. ఒక పీపీఎం (పార్ట్స్ పర్ మిలియన్) కంటే తక్కువగా ఉండాల్సిన పాదరసం ఈ క్రీమ్‌లో ఏకంగా 5,000 పీపీఎం ఉన్నది. పాదరసం, సీసం లోహాలు చర్మపు రంగుకు కారణమయ్యే వర్ణద్రవ్యం అయిన మెలనిన్ ఉత్పత్తికి ఆటంకం కలిగిస్తాయి. ఇది మెలనిన్ ఉత్పత్తిని నిరోధించడం వల్ల చర్మం లేత రంగులో కనిపిస్తుంది. ఈ క్రీమ్ వాడకం ఆపేసిన తర్వాత చర్మం దాని అసలు రంగులోకి తిరిగి వస్తుంది.

మరోవైపు ఈ క్రీమ్‌ను పూసిన తర్వాత మొదట చర్మాన్ని లక్ష్యంగా చేసుకుంటుంది. దీనివల్ల చర్మం ఎర్రగా మారి దురదగా అనిపిస్తుంది. ఎక్కువ కాలం వాడటం వల్ల చర్మం పలుచగా మారి రక్తనాళాలు కూడా కనిపిస్తాయి. పాదరసం, సీసం వంటి విషపూరితాలు చర్మంలోకి శోషించిన తర్వాత రక్తప్రవాహం ద్వారా మెదడు, నాడీ వ్యవస్థకు ప్రయాణిస్తాయి. న్యూరోటాక్సిన్‌లుగా (నరాల విషాలుగా) పనిచేస్తూ శరీరానికి కోలుకోలేని నష్టాన్ని కలిగిస్తాయి.

అలాగే శరీరం ఈ విషపదార్థాలను బయటకు పంపడానికి ప్రయత్నించినప్పుడు మూత్రపిండాలు, కాలేయంలో అవి పేరుకుపోతాయి. దీంతో కాలేయం, మూత్రపిండాలు, ఊపిరితిత్తులు వంటి అంతర్గత అవయవాలకు తీవ్ర నష్టం కలుగుతుందని వైద్య నిఫుణులు ఆందోళన వ్యక్తం చేశారు. మహారాష్ట్రలో 18 మంది మహిళలు తీవ్రమైన మూత్రపిండాల వ్యాధికి గురైనట్లు డాక్టర్లు గుర్తించారు. ఆ మహిళలంతా ఈ క్రీమ్‌ను వాడినట్లు తెలుసుకున్నారు. ఆ క్రీమ్‌లో ఆందోళనకరమైన రీతిలో సీసం, పాదరసం ఉన్నట్లు ల్యాబ్ పరీక్షలు నిర్ధారించాయి. ఈ నేపథ్యంలో పాక్‌ తయారీ ఫెయిర్‌నెస్‌ క్రీమ్‌ను నిషేధించాలని డాక్టర్లు డిమాండ్‌ చేస్తున్నారు.

అయినప్పటికీ మహారాష్ట్ర, మధ్యప్రదేశ్‌లోని మార్కెట్లతో పాటు ఆన్‌లైన్ ప్లాట్‌ఫారమ్‌లలో పాక్‌కు చెందిన ఈ ఫెయిర్‌నెస్‌ క్రీమ్ ఇప్పటికీ అందుబాటులో ఉన్నది. మహారాష్ట్రలోని అమరావతి, నాగ్‌పూర్ మీదుగా, ఖండ్వా, బుర్హాన్‌పూర్ ద్వారా మధ్యప్రదేశ్‌లోకి ఈ పాక్‌ క్రీమ్‌లు ప్రవేశిస్తున్నట్లు పోలీసులు గుర్తించారు. ఆ తర్వాత మధ్యప్రదేశ్‌లోని వివిధ ప్రాంతాలకు చేరుతున్నట్లు గ్రహించారు. ఈ నేపథ్యంలో వాణిజ్య నిషేధం ఉన్నప్పటికీ పాకిస్థాన్‌ తయారీ ఫెయిర్‌నెస్‌ క్రీమ్‌ ఉత్పత్తులు ఏ ఏ మార్గాల ద్వారా దేశంలోకి ప్రవేశిస్తున్నాయి అన్నది పోలీసులు దర్యాప్తు చేస్తున్నారు. అంతర్జాతీయంగా కూడా న్యూజిల్యాండ్‌, ఫిలిప్పీన్స్‌లో పాక్‌ క్రీమ్‌ను కొన్నేళ్ల కిందటే నిషేధించారు.