S-400 Air Defence System:63 వేల కోట్ల ఖ‌ర్చుతో మ‌రో 5 ఎస్-400 ఎయిర్ డిఫెన్స్ సిస్ట‌మ్స్ కొనుగోలు !

S-400 Air Defence System: 63 వేల కోట్ల ఖ‌ర్చుతో మ‌రో 5 ఎస్-400 ఎయిర్ డిఫెన్స్ సిస్ట‌మ్స్ కొనుగోలు చేసే ఆలోచ‌న‌లో భార‌త్ ఉన్న‌ట్లు తెలిసింది. ఆ ప్ర‌తిపాద‌న‌కు ర‌క్ష‌ణ శాఖ కార్య‌ద‌ర్శి ఓకే చెప్పిన‌ట్లు ఓ మీడియా క‌థ‌నం ద్వారా తెలిసింది. ఆప‌రేష‌న్ సింధూర్ స‌మ‌యంలో ఎస్‌-400 మిస్సైల్ వ్య‌వ‌స్థ కీల‌కంగా వ్య‌వ‌హ‌రించిన విష‌యం తెలిసిందే.

న్యూఢిల్లీ: భార‌త అమ్ముల‌పొదిలోకి మ‌రిన్ని ఎస్-400 ఎయిర్ డిఫెన్స్ సిస్ట‌మ్స్(S-400 Air Defence System) రానున్నాయి. ర‌ష్యా త‌యారీకి చెందిన మిస్సైల్ ర‌క్ష‌ణ వ్య‌వ‌స్థ‌ను రెట్టింపు చేసుకోవాల‌ని భార‌త్ యోచిస్తున్న‌ది. దీనిలో భాగంగా మ‌రో అయిదు కొత్త ఎస్‌-400 ఎయిర్ డిఫెన్స్ సిస్ట‌మ్స్‌ను కొనుగోలు చేసేందుకు భార‌త్ ఆస‌క్తిగా ఉన్న‌ది. సుమారు 63 వేల కోట్ల ఖ‌ర్చుతో 5 ఎస్-400 డిఫెన్స్ సిస్ట‌మ్స్‌ను కొనే ప్ర‌తిపాద‌న‌కు ర‌క్ష‌ణ శాఖ కార్య‌ద‌ర్శి ఓకే చెప్పిన‌ట్లు తెలుస్తోంది. డిఫెన్స్ ప్రొక్యూర్మెంట్ బోర్డు నేతృత్వంలో జ‌రిగిన స‌మావేశంలో ఈ నిర్ణ‌యం తీసుకున్న‌ట్లు తెలుస్తోంది. అద‌న‌పు 5 ఎస్-400 డిఫెన్స్ సిస్ట‌మ్స్‌తో.. భార‌త్ వాటి సంఖ్య‌ను రెట్టింపు చేసుకోనున్న‌ది.

2018లో సుమారు 5.4 బిలియ‌న్ల డాల‌ర్ల‌తో 5 ఎస్‌-400 సిస్ట‌మ్స్‌కు భార‌త్ ఆర్డ‌ర్ ఇచ్చింది. ఇప్ప‌టి వ‌ర‌కు మూడు సిస్ట‌మ్స్ డెలివ‌రీ అయ్యాయి. ఈ ఏడాది చివ‌రి వ‌ర‌కు మ‌రో రెండు సిస్ట‌మ్స్ భార‌త్‌కు అంద‌నున్నాయి. ర‌ష్యా-ఉక్రెయిన్ యుద్ధం వ‌ల్ల ఎస్-400 సిస్ట‌మ్స్ అప్ప‌గింత ఆల‌స్యం అవుతున్న‌ది. ఆప‌రేష‌న్ సింధూర్ స‌మ‌యంలో ఎస్‌-400 సిస్ట‌మ్ కీల‌కంగా వ్య‌వ‌హ‌రించిన విష‌యం తెలిసిందే. గ‌త వారం భార‌తీయ వైమానిక ద‌ళం ఎస్‌-400 సిస్ట‌మ్‌కు చెందిన ఓ వీడియోను కూడా పోస్టు చేసిన విష‌యం తెలిసిందే.