వైభవంగా దలైలామా పుట్టిన రోజు

ఎడతెరపి లేకుండా కురుస్తున్న వర్షాన్ని లెక్క చేయకుండా వేలాది మంది ప్రజలు బౌద్ధుల ఆధ్మాత్మిక గురువు 14వ దలైలామా 90వ జన్మదిన ఉత్సవానికి హాజరయ్యారు.

• వారసుడి ఎంపికపై రాని ప్రకటన

ధర్మశాల: ఎడతెరపి లేకుండా కురుస్తున్న వర్షాన్ని లెక్క చేయకుండా వేలాది మంది ప్రజలు బౌద్ధుల ఆధ్మాత్మిక గురువు 14వ దలైలామా 90వ జన్మదిన ఉత్సవానికి హాజరయ్యారు. ధర్మశాలలో దలైలామా ఆలయంగా పిలుచుకునే సుగ్లఖాంగ్‌ ప్రాంగణంలో ఆదివారం ఈ కార్యక్రమం జరిగింది. అయితే దలైలామా వారసునిపై ఎలాంటి ప్రకటన వెలువడలేదు. ప్రజలు తనపై చూపుతున్న ప్రేమే మానవులందరికీ సేవ చేసే స్ఫూర్తిని తనకు కలుగచేస్తోందని దలైలామా చెప్పారు.

ఆ అధికారం ఆయనకు లేదు: చైనా

టిబెటన్‌ బౌద్ధుల పునర్జన్మ విధానం కొనసాగింపుపై నిర్ణయం తీసుకునే అధికారం దలైలామాకు లేదని భారత్‌లోని చైనా రాయబారి జూ ఫేహాంగ్‌ ఆదివారం ప్రకటించారు. శతాబ్దాల నాటి మతపరమైన సంప్రదాయాన్ని ఆయన మార్చలేరని ఫేహాంగ్‌ వ్యాఖ్యానించారు.