రాయ్పూర్: బీజేపీ అభ్యర్థి ఓడిపోతే మీసం సగం తీయడంతోపాటు అర గుండు చేయించుకుంటానని ఒక వ్యక్తి స్నేహితులతో పందెం కాశాడు. (Man Partially shaved hair, moustache) ఆ బీజేపీ అభ్యర్థి ఓడిపోవడంతో పందెం ప్రకారం అన్నంత పని చేశాడు. మీసం సగం వరకు షేవ్ చేయడంతోపాటు అర గుండు చేయించుకున్నాడు. ఛత్తీస్గఢ్లోని మహాసముంద్ జిల్లాలో ఈ సంఘటన జరిగింది. ఆ రాష్ట్రంలో జరిగిన అసెంబ్లీ ఎన్నికల్లో బీజేపీ విజయం సాధించింది. అయితే ఆదివారం కౌంటింగ్ సందర్భంగా ఎలక్ట్రీషియన్ దేర్హా రామ్ యాదవ్ తన స్నేహితులతో పందెం కాశాడు. కల్లారి అసెంబ్లీ నియోజవర్గం నుంచి పోటీ చేసిన బీజేపీ అభ్యర్థి అల్కా చంద్రకర్ ఓడిపోతే తన తల, మీసం పాక్షికంగా తీసేస్తానని చెప్పాడు.
కాగా, ఆదివారం నాటి ఎన్నికల ఫలితాల్లో కల్లారి స్థానం నుంచి కాంగ్రెస్ అభ్యర్థి ద్వారికాధీష్ యాదవ్ చేతిలో బీజేపీ అభ్యర్థి చంద్రకర్ ఓడిపోయాడు. దీంతో దేర్హా రామ్ యాదవ్ వెంటనే బార్బర్ షాప్కు వెళ్లాడు. పందెం మేరకు సగం గుండు కొట్టించుకోవడంతోపాటు సగం వరకు మీసం తీసేశాడు. అతడు అరగుండు, అర మీసంతో ఉన్న ఫొటో సోషల్ మీడియాలో వైరల్ అయ్యింది.