Viral News | ప్రేమికులు బైకులపై విహరిస్తూ స్టంట్స్ చేస్తున్న దృశ్యాలు ఇటీవల సోషల్ మీడియాలో వైరల్ అవుతున్న విషయం తెలిసిందే. తాజాగా ఢిల్లీ వీధుల్లో ఓ జంట స్పైడర్ మ్యాన్, స్పైడర్ ఉమెన్ డ్రెస్లు ధరించి బైక్ షికారుకు వెళ్లింది. ఈ విషయం గమనించిన పోలీసులు జంటను అరెస్టు చేశారు. అలాగే, భారీగానే చలాన్స్ జారీ చేశారు.
వివరాల్లోకి వెళితే.. నజాఫ్గడ్కు చెందిన ఆదిత్య వర్మతో పాటు ఓ యువతితో కలిసి స్పైడర్ మ్యాన్ నజాఫ్ గఢ్ పార్ట్-5 పేరుతో సోషల్ మీడియాలో పోస్ట్ చేసేందుకు బైక్ రైడింగ్ చేయాలని నిర్ణయించుకున్నారు. అలాగే, కొత్తగా ఉండాలని స్పైడర్ మ్యాన్, స్పైడర్ ఉమెన్లా డ్రెస్ వేసుకొని బైక్పై ఢిల్లీ వీధుల్లో షికారు కొట్టారు. సెల్ఫీలు, వీడియోలు తీస్తూ ఇన్స్టాగ్రామ్లో పోస్ట్ చేయడంతో వైరల్గా మారాయి. ఈ వీడియోలు వాయువ్య ఢిల్లీలోని ద్వారాక ట్రాఫిక్ పోలీసుల దృష్టికి వచ్చాయి. జంటను అదుపులోకి తీసుకున్నారు.
ఎంవీఐ యాక్ట్ కింద జరిమానా విధించి వదిలేశారు. నంబర్ ప్లేట్లేని బైక్ నడపడంతో పాటు హెల్మెట్ ధరించకపోవడంతో వివిధ సెక్షన్ల కింద కేసు నమోదు చేసి చలాన్లు జారీ చేశారు. అయితే, ఆదిత్య వర్మకు ఇలాంటివి కొత్తవేమీ కాదు. ఇండియన్ స్పైడీ పేరుతో వీడియోలు చేస్తూ వచ్చాడు. స్పైడీ బ్యాడ్మింటన్, ట్రాక్టర్ నడుపుతూ, ట్రెండింగ్ సాంగ్స్ డాన్స్ చేస్తూ వస్తున్నాడు. కాలేజీ వేడుకల్లో జరిగే స్పాట్ ప్రదర్శనలు సైతం ఇస్తూ వస్తుంటాడు.