Bombay High Court: దియా మీర్జా యాడ్‌ను రిస్టోర్ చేయండి.. బాంబే హైకోర్టు ఆదేశాలు

Bombay High Court: భార‌త్ సెక్యుల‌ర్ దేశ‌మ‌ని, న‌టి దియా మీర్జా దీపావ‌ళి యాడ్‌ను మ‌ళ్లీ రిస్టోర్ చేయాల‌ని బీఎంసీకి బాంబే హైకోర్టు ఆదేశాలు ఇచ్చింది. ప‌ర్యావ‌ర‌ణ‌హితంగా దీపావ‌ళి జ‌రుపుకోవాల‌ని దియా చేసిన యాడ్ వివాదాస్ప‌ద‌మైన విష‌యం తెలిసిందే.

ముంబై: దీపావ‌ళి పండుగ‌పై బాలీవుడ్ న‌టి దియా మీర్జా చేసిన వీడియోను తొలుత ముంబై మున్సిపాల్టీ వాడుకున్న విష‌యం తెలిసిందే. కానీ ఆ వీడియోపై రాజ‌కీయ నేత‌లు వ్యాఖ్య‌లు చేయ‌డంతో దాన్ని డిలీట్ చేశారు. అయితే ఇవాళ ముంబై హైకోర్టు(Bombay High Court) కీల‌క ఆదేశాలు ఇచ్చింది. దియా మీర్జా యాడ్‌ను బీఎంసీ అకౌంట్‌లో పున‌రుద్ద‌రించాల‌ని హైకోర్టు త‌న ఆదేశాల్లో పేర్కొన్న‌ది. ఈ కేసు విచార‌ణ సంద‌ర్భంగా కోర్టు స్పందిస్తూ.. భార‌త దేశం సెక్యుల‌ర్ దేశ‌మ‌ని పేర్కొన్న‌ది. ప‌ర్యావ‌ర‌ణ‌హితంగా దీపావ‌ళిని జ‌రుపుకోవాల‌ని దియా మీర్జా త‌న వీడియోలో కోరింది. గ‌తంలో హైకోర్టు ఇచ్చిన ఆదేశాల‌ను ఊటంకిస్తూ ఆమె త‌న వీడియోలో ప‌బ్లిక్ రోడ్ల‌పై బాణాసంచా పేల్చ‌రాదు అని దియా పేర్కొన్న‌ది. ఆ వీడియోపై బీజేపీ నేత‌లు సీరియ‌స్ అయ్యారు. ముంబై బీజేపీ చీఫ్ అమీత్ స‌త్నం ఆ వీడియోపై అభ్యంత‌రం వ్య‌క్తం చేశారు. దీంతో బీఎంసీ అకౌంట్ నుంచి ఆ వీడియోను డిలీట్ చేశారు.