Visit:
Polio Vaccine | హైదరాబాద్‌కు చెందిన ప్రముఖ బయోలాజికల్‌-ఈ లిమిటెడ్‌ నోవెల్‌ ఓరల్‌ పోలియో వ్యాక్సిన్ టైప్ 2 (nOPV2)కి ప్రపంచ ఆరోగ్య సంస్థ (WHO) ప్రీ-క్వాలిఫికేషన్ ఇచ్చింది. ఈ విషయాన్ని కంపెనీ మంగళవారం వెల్లడించింది. నోటి ద్వారా వేసే వ్యాక్సిన్ పోలియో వైరస్ వ్యాప్తిని ప్రమాదాన్ని గణనీయంగా తగ్గిస్తుందని కంపెనీ పేర్కొంది. పోలియోపై పోరాటంలో కీలకమైందని.. వ్యాక్సిన్ పోలియో వైరస్ టైప్-2 వ్యాప్తి ముప్పును విజయవంతంగా ఎదుర్కొంటుందని తెలిపింది. వ్యాక్సిన్ మెరుగైన జన్యు స్థిరత్వాన్ని కలిగి ఉందని.. సబిన్ పోలియో వైరస్ టైప్-2 (mOPV2) వ్యాక్సిన్‌తో పోలిస్తే కొత్తగా వ్యాప్తి చెందే ప్రమాదాన్ని గణనీయంగా తగ్గిస్తుందని చెప్పింది. ఈ సందర్భంగా కంపెనీ మేనేజింగ్‌ డైరెక్టర్‌ మహిమా దాట్ల స్పందిస్తూ పోలియో నిర్మూలనకు ప్రపంచవ్యాప్త ప్రయత్నంలో భాగమైనందుకు తాము సంతోషిస్తున్నామన్నారు.
ప్రపంచ ఆరోగ్య సంస్థ ప్రీ క్వాలిఫికేషన్.. పోలియో నిర్మూలనలో తమ ప్రయత్నంలో కీలకమైన మైలురాయని పేర్కొన్నారు. ఈ సందర్భంగా పీటీ బయోఫార్మాకు, గేట్స్‌ ఫౌండేషన్‌కు ఆమె కృతజ్ఞతలు తెలిపారు. ఇకపై పోలియో వినాశకరమైన ప్రభావాలతో ఏ ఒక్క పిల్లవాడు ప్రభావితం కాడని హామీ ఇస్తున్నామన్నారు. ఇది ప్రపంచవ్యాప్తంగా మిలియన్ల మంది పిల్లలు, కుటుంబాలకు ఆశాదీపంగా మారుతుందని.. పోలియో వ్యాప్తి చెందుతున్న ప్రాంతాల్లో బిలియన్‌ డోసుల వ్యాక్సిన్‌ను అందించడం ద్వారా పోలియో రహిత ప్రపంచం కలను సాకారం చేయడంలో చాలా కీలమన్నారు. ఇండోనేషియాలోని పీటీ బయోఫార్మా సహకారంతో ప్రపంచ ఆరోగ్య సంస్థ ప్రీ క్వాలిఫికేషన్ పొందిన తయారీదారుగా నిలిచింది. పీటీ బయోఫార్మా నుంచి పీటీబీ సాంకేతికను పొందగా.. 500 మిలియన్ల కంటే ఎక్కువ మోతాదులను ఉత్పత్తి చేసే అవకాశం ఉన్నది. వ్యాక్సిన్‌ను ఎగుమతి చేసేందుకు కంపెనీకి భారత డ్రగ్‌ నియంత్రణ సంస్థల నుంచి ఆమోదం సైతం పొందింది.
