నేడు గుజరాత్‌ 18వ సీఎంగా భూపేంద్ర పటేల్‌ ప్రమాణం

Bhupendra Patel | గుజరాత్‌ ముఖ్యమంత్రిగా భూపేంద్ర భాయ్‌ పటేల్‌ మరోసారి ప్రమాణ స్వీకారం చేయనున్నారు. అసెంబ్లీ ఎన్నికలకు ఏడాది ముందు తొలిసారి సీఎంగా బాధ్యతలు చేపట్టారు. తాజా జరిగిన ఎన్నికల్లో

గాంధీనగర్‌‌: గుజరాత్‌ ముఖ్యమంత్రిగా భూపేంద్ర భాయ్‌ పటేల్‌ మరోసారి ప్రమాణ స్వీకారం చేయనున్నారు. అసెంబ్లీ ఎన్నికలకు ఏడాది ముందు తొలిసారి సీఎంగా బాధ్యతలు చేపట్టారు. తాజా జరిగిన ఎన్నికల్లో ఆయన నేతృత్వంలోనే బీజేపీ చారిత్రక విజయం సాధించిన విషయం తెలిసిందే. దీంతో మరోసారి పార్టీ అధిష్ఠానం ఆయనకే పాలనా పగ్గాలు అప్పజెప్పింది. ఈనేపథ్యంలో సోమవారం మధ్యాహ్నం 2 గంటలకు రాష్ట్ర 18వ ముఖ్యమంత్రిగా భూపేంద్ర ప్రమాణం చేయనున్నారు. గాంధీనగర్‌లోని కొత్త సెక్రటేరియట్‌ భవనంలో గవర్నర్‌ దేవవ్రత్‌ ఆయనతో ప్రమాణం చేయిస్తారు. ఈ కార్యక్రమానికి ప్రధాని మోదీ, కేంద్ర హోం మంత్రి అమిత్‌ షా, బీజేపీ పాలిత ముఖ్యమంత్రులు హాజరుకానున్నారు.

రెండు విడుతల్లో జరిగిన గుజరాత్ అసెంబ్లీ ఎన్నికల్లో మొత్తం 182 అసెంబ్లీ స్థానాలకు గాను బీజేపీ 156 సీట్లను హస్తగతం చేసుకున్నది. ఇక కాంగ్రెస్ 17 స్థానాలకే పరిమితమవగా, ఆప్‌ 5 ఎమ్మెల్యేలను గెలుపొందింది. ఇక సీఎం భూపేంద్ర పటేల్.. అహ్మదాబాద్ జిల్లాలోని ఘట్లోడియా స్థానం నుంచి 1.92 లక్షలకుపైగా ఓట్ల మెజార్టీతో గెలుపొందారు.