విదేశీ నిధులు సీజ్‌.. అదానీ కంపెనీ షేర్లు ప‌త‌నం

ముంబై : అదానీ కంపెనీ షేర్లు దారుణంగా ప‌డిపోయాయి. సుమారు 25 శాతం వ‌ర‌కు ఆ కంపెనీల షేర్లు ప‌త‌న‌మైన‌ట్లు తెలుస్తోంది. అదానీ గ్రూపుకు చెందిన సుమారు 43వేల కోట్ల విలువైన మూడు కంపెనీల విదేశీ నిధుల‌ను నేష‌న‌ల్ సెక్యూరిటీస్ డిపాజిట‌రీ లిమిటెడ్ సీజ్‌ చేయ‌డంతో ఆ కంపెనీ షేర్లు డౌన‌య్యాయి. అల్‌బులా ఇన్వెస్ట్‌మెంట్ ఫండ్‌, క్రెస్టా ఫండ్‌, ఏపీఎంఎస్ ఇన్వెస్ట్‌మెంట్ ఫండ్ కంపెనీల నిధుల‌ను ఎన్ఎస్‌డీఎల్ నిలిపివేసింది. గ‌త ఏడాది సుమారు 800 శాతం దూసుకువెళ్లిన అదానీ గ్రూపు ఇప్పుడు ఒకేసారి బోల్తాకొట్టింది. పీఎంఎల్ఏ చ‌ట్టం ప్ర‌కారం ఆ మూడు విదేశీ కంపెనీల వివ‌రాల‌ను ఆదానీ గ్రూపు వెల్ల‌డించ‌లేదు. దీంతో నేష‌న‌ల్ సెక్యూరిటీస్ చ‌ర్య‌లు తీసుకున్న‌ది.

గ‌త ద‌శాబ్ధ కాలంలో అదానీ షేర్లు ప‌తనం కావ‌డం ఇదే మొద‌టిసారి. అదానీ పోర్ట్స్ 19 శాతం ప‌త‌న‌మైన‌ట్లు నిఫ్టీ పేర్కొన్న‌ది. ఇటీవ‌ల అదానీ షేర్లు దూసుకెళ్ల‌డంతో.. దాని చైర్మెన్ గౌత‌మ్ అదానీ .. ఆసియాలో రెండ‌వ సంప‌న్న వ్య‌క్తిగా నిలిచారు. అదానీ ఎంట‌ర్‌ప్రైజెస్ షేర్లు గ‌త ఏడాది కాలంలో ప‌ది రేట్లు పెరిగాయి. అదానీ ట్రాన్స్‌మిష‌న్ షేర్లు కూడా ఎనిమిది రేట్లు పెరిగాయి. అదానీ పోర్ట్స్ 148 శాతం, అదానీ గ్రీన్ 267 శాతం గ‌త ఏడాది పెరిగాయి. అయితే ఇవాళ షేర్లు ప‌త‌న‌మైన అంశంపై అదానీ కంపెనీ స్పందించ‌లేదు. సెబీ, ఎన్ఎస్‌డీఎల్ కూడా ఇంకా కామెంట్ చేయ‌లేదు.