న్యూఢిల్లీ : సనౌర్కు చెందిన ఆప్ ఎమ్మెల్యే హర్మీత్ సింగ్ పఠన్మజ్రా (46) ఇబ్బందుల్లో చిక్కుకున్నారు. మొదటి భార్యతో వైవాహిక బంధం కొనసాగిస్తునే తనను పెండ్లి చేసుకున్నాడని రెండవ భార్య ఆరోపించింది. మరోవైపు రెండో భార్యతో ఆయన సన్నిహితంగా ఉన్న వీడియో సోషల్ మీడియాలో వైరల్ అవుతోంది. హర్మీత్ మొదటి పెండ్లిని దాచి రెండో వివాహం చేసుకున్నాడని ఆరోపణలు వచ్చాయి. అయితే మొదటి భార్యతో చట్టబద్ధంగా విడిపోయిన తర్వాతే రెండో వివాహం చేసుకున్నానని హర్మీత్ చెప్పుకొచ్చారు. ఆప్ ఎమ్మెల్యే హర్మీత్ మొదటి వివాహాన్ని దాచి రెండో పెండ్లి చేసుకున్నాడని ఆయన రెండవ భార్య జికార్పూర్ పోలీస్ స్టేషన్లో ఫిర్యాదు చేసింది.
ఇక తనకు తెలియకుండానే రెండవ భార్యతో సన్నిహితంగా ఉన్న వీడియోను రికార్డు చేశారని, ఈ వీడియోను రెండవ భార్య దుర్వినియోగం చేస్తూ లీక్ చేసిందని హర్మీత్ ఆరోపించారు. తనకు ఇన్ఫెక్షన్ సోకడంతో రెండవ భార్యకు వీడియో కాల్ ద్వారా చూపించానని తన శరీర భాగాలు ఆ వీడియో కనిపించడంపై ఆప్ ఎమ్మెల్యే వివరణ ఇచ్చారు. ఇది తనకు వ్యతిరేకంగా జరిగిన కుట్రని ఆయన ఆరోపించారు. భార్యాభర్తలు సన్నిహితంగా ఉండేలా ఎన్నో క్షణాలను పంచుకుంటారని, ఆమె తన వీడియో కాల్ రికార్డు చేస్తుందని తనకు తెలియదని చెప్పారు.
ఆమె ఈ వీడియోను ఇప్పడు వైరల్ చేసి తన ప్రతిష్టను దెబ్బతీసిందని వాపోయారు. ఇక 2021 ఆగస్ట్ 14న తాము వివాహం చేసుకున్నామని, ఇందుకు సంబంధించి మ్యారేజ్ సర్టిఫికెట్ సహా అన్ని పత్రాలూ ఉన్నాయని ఆయన రెండో భార్య గురుప్రీత్ కౌర్ పోలీసులకు ఇచ్చిన ఫిర్యాదులో పేర్కొన్నారు. మొదటి భార్యకు విడాకులు ఇచ్చానని, మన వివాహం చట్టప్రకారం చెల్లుబాటు అవుతుందని వివాహ సమయంలో హర్మీత్ తనకు చెప్పాడని ఆమె వెల్లడించింది.