Supreme Court: 3 రాష్ట్రాల మ‌ధ్య 60 ఏళ్లుగా విద్యుత్తు వివాదం.. ప‌రిష్క‌రించిన సుప్రీంకోర్టు

Supreme Court: 60 ఏళ్లుగా పంజాబ్‌, హ‌ర్యానా, హిమాచ‌ల్ ప్ర‌దేశ్ మ‌ధ్య నెల‌కొన్న భాక్రా నంగ‌ల్ ప్రాజెక్టు విద్యుత్తు స‌ర‌ఫ‌రా అంశంలో త‌లెత్తిన వివాదాన్ని సుప్రీంకోర్టు ప‌రిష్క‌రించింది. కేంద్రం చేసిన ప్ర‌తిపాద‌న ప్ర‌కారం రాబోయే 20 ఏళ్ల‌లో 11,973 మిలియ‌న్ యూనిట్ల క‌రెంట్‌ను హిమాచ‌ల్‌కు మిగితా రెండు రాష్ట్రాలు ఇవ్వ‌నున్నాయి.

న్యూఢిల్లీ: సుమారు 60 ఏళ్లుగా మూడు రాష్ట్రాల మ‌ధ్య నెల‌కొన్న విద్యుత్తు వివాదానికి సుప్రీంకోర్టు(Supreme Court) ప‌రిష్కారం చూపింది. పంజాబ్‌, హ‌ర్యానా, హిమాచ‌ల్ ప్ర‌దేశ్ మ‌ధ్య భాక్రా నంగ‌ల్ ప్రాజెక్టు విద్యుత్తు స‌ర‌ఫ‌రా అంశంలో వివాదం ఉన్న‌ది. 1966 నుంచి వ‌స్తున్న ఆ స‌మ‌స్య‌ను ఇవాళ సుప్రీం ప‌రిష్క‌రించింది. కేంద్రం ప్ర‌తిపాదించిన క్యాష్‌లెస్ పేమెంట్ విధానాన్ని సుప్రీం కోర్టు ఆమోదించింది. పంజాబ్ , హ‌ర్యానా రాష్ట్రాలు.. హిమాచ‌ల్ ప్ర‌దేశ్‌కు న‌గ‌దు బ‌దులుగా విద్యుత్తును అంద‌జేసేందుకు ముందుకు వ‌చ్చాయి. అయితే ఆ ప్ర‌తిపాద‌న‌ను సుప్రీంలోని త్రిస‌భ్య ధ‌ర్మాస‌నం అంగీక‌రించింది. చీఫ్ జ‌స్టిస్ సూర్య‌కాంత్‌, జ‌స్టిస్ జోయ్‌మాల్యా బాగ్చీ, వీ మోహ‌న‌తో కూడిన ధ‌ర్మాస‌నం కేంద్ర ప్ర‌తిపాద‌న‌ను ఆహ్వానించింది.

అయితే ఆ ప్ర‌తిపాద‌న ప్ర‌కారం పంజాబ్‌, హ‌ర్యానా రాష్ట్రాలు రాబోయే 20 ఏళ్ల‌లో హిమాచ‌ల్ ప్ర‌దేశ్‌కు సుమారు 11,973 మిలియ‌న్ల యూనిట్ల విద్యుత్తును స‌ర‌ఫ‌రా చేయ‌నున్నాయి. 2011 నాటి సుప్రీం తీర్పును అనుస‌రించే ఈ ఏర్పాటు చేసిన‌ట్లు ధ‌ర్మాస‌నం వెల్ల‌డించింది. భాక్రా నంగ‌ల్‌, బియాస్ హైడ్రో ప‌వ‌ర్ ప్రాజెక్టుల‌పై 1966 నుంచి మూడు రాష్ట్రాల మ‌ధ్య వివాదం ఉన్న‌ది. గ‌త తీర్పు ప్ర‌కారం హిమాచ‌ల్ ప్ర‌దేశ్‌కు 7.19 శాతం బాకీలు చెల్లించాల్సి ఉంటుంది. డ్యామ్‌ల నిర్మాణ ఖ‌ర్చు అంశంలో రెండు రాష్ట్రాలకు హిమాచ‌ల్ ప్ర‌దేశ్‌ ఏమీ చెల్లించ‌వ‌ల‌సిన అవ‌స‌రం లేదు.