‘ముదిరాజ్‌లను బీసీ-ఏలో చేర్చే హామీని వ్యతిరేకిస్తున్నాం’

ముదిరాజ్‌ కులాన్ని బీసీ-డీ నుండి బీసీ-ఏలోకి మారుస్తామని ముఖ్యమంత్రి రేవంత్‌రెడ్డి ఇచ్చిన హామీని వ్యతిరేకిస్తున్నట్లు బీసీ-ఏ కులాల ఐక్యవేదిక నాయకులు స్ప‌ష్టం చేశారు. శుక్రవారం నల్లగొండ జిల్లా కేంద్రంలోని ఎస్‌బీఆర్‌ ఫంక్షన్‌ హాల్‌లో నిర్వహించిన...

– బీసీ-ఏ కులాల ఐక్యవేదిక

నల్లగొండ రూరల్, అక్టోబర్ 23 : ముదిరాజ్‌ కులాన్ని బీసీ-డీ నుండి బీసీ-ఏలోకి మారుస్తామని ముఖ్యమంత్రి రేవంత్‌రెడ్డి ఇచ్చిన హామీని వ్యతిరేకిస్తున్నట్లు బీసీ-ఏ కులాల ఐక్యవేదిక నాయకులు స్ప‌ష్టం చేశారు. శుక్రవారం నల్లగొండ జిల్లా కేంద్రంలోని ఎస్‌బీఆర్‌ ఫంక్షన్‌ హాల్‌లో నిర్వహించిన మీడియా సమావేశంలో వారు మాట్లాడారు. రవీంద్రభారతిలో పండుగ సాయన్న జయంతి వేడుకల సందర్భంగా ముదిరాజ్‌లను బీసీ-ఏలో చేర్చుతామని ముఖ్యమంత్రి హామీ ఇచ్చినట్లు పేర్కొన్నారు. ఇప్పటికే బీసీ-ఏ వర్గాలకు అమలవుతున్న 7 శాతం రిజర్వేషన్లను యథాతథంగా కొనసాగించాలని డిమాండ్‌ చేశారు. ముదిరాజ్‌లకు అదనపు రిజర్వేషన్లు కల్పించాలనుకుంటే బీసీ-ఏకు వేరుగా ప్రత్యేక కేటగిరీ ఏర్పాటు చేయాలని సూచించారు. గతంలో ఇలాంటి ప్రయత్నాలను న్యాయస్థానాలు కొట్టివేసిన విషయాన్ని పరిగణనలోకి తీసుకోవాలని కోరారు. అమలు సాధ్యం కాని హామీలతో బీసీ కులాల మధ్య విభేదాలు సృష్టించవద్దని అన్ని రాజకీయ పార్టీలకు విజ్ఞప్తి చేశారు. ఈ సమావేశంలో కంది సూర్యనారాయణ, సింగం రాంమోహన్‌, లకడాపురం వెంకటేశ్వర్లు, నేలపట్ల సత్యనారాయణ, గుండు వెంకటేశ్వర్లు, యలిజాల వెంకన్న, తడం సతీష్‌కుమార్‌ పాల్గొన్నారు.