గుర్రంపోడులో రైతుల‌కు హెచ్‌పీఎస్‌, ఐసీఎంపై శిక్ష‌ణ‌

గుర్రంపోడు మండలంలోని రైతు వేదికలో శుక్రవారం ఏవో కంచర్ల మాధవరెడ్డి రైతులకు పత్తి సాగులో హెచ్‌పీఎస్ (హై డెనిసిటి ప్లాంటింగ్ సిస్టమ్) అలాగే ఐసిఎం (ఇంటిగ్రెడెట్ క్రాఫ్ మెనేజీమెంట్) పద్ధతులపై శిక్షణ కార్యక్రమం నిర్వహించారు. ఈ సందర్భంగా ఆయన మాట్లాడుతూ..

గుర్రంపోడు, అక్టోబర్ 09 : గుర్రంపోడు మండలంలోని రైతు వేదికలో శుక్రవారం ఏవో కంచర్ల మాధవరెడ్డి రైతులకు పత్తి సాగులో హెచ్‌పీఎస్ (హై డెనిసిటి ప్లాంటింగ్ సిస్టమ్) అలాగే ఐసిఎం (ఇంటిగ్రెడెట్ క్రాఫ్ మెనేజీమెంట్) పద్ధతులపై శిక్షణ కార్యక్రమం నిర్వహించారు. ఈ సందర్భంగా ఆయన మాట్లాడుతూ.. రైతులకు పత్తి సాగులో అధిక సాంద్రత పద్ధతిలో సాగు చేయడం, సమగ్ర పంట యాజమాన్య పద్ధతులు పాటించడం, సరైన ఎరువుల యాజమాన్యం, నీటి వినియోగం, చీడపీడల నివారణ మరియు పంట దిగుబడిని పెంచే ఆధునిక వ్యవసాయ పద్ధతులపై అవగాహన కల్పించారు. ఎల్‌నినో ప్రభావం కారణంగా ఉష్ణోగ్రతలు పెరగడం, వర్షపాతం అస్థిరంగా ఉండడం అలాగే నీటి కొరత ఏర్పడే అవకాశం ఉన్నందున రైతులు తక్కువ వ్యవధి పంట రకాలను ఎంపిక చేసుకోవాలని, వాతావరణ ఆధారిత సాగు ప్రణాళిక రూపొందించుకోవాలని సూచించారు.

నేలలో తేమను కాపాడేందుకు పంట అవశేషాలను ఉపయోగించడం, మల్చింగ్ చేయడం, అవసరానికి అనుగుణంగా మాత్రమే నీటి పారుదల చేయడం, వర్షపు నీటిని సంరక్షించడం అలాగే వాతావరణ హెచ్చరికలను అనుసరించడం వంటి చర్యలు చేపట్టాలని తెలిపారు. అధిక ఉష్ణోగ్రతలు మరియు వర్షాభావ పరిస్థితుల్లో పంటలను రక్షించేందుకు సమగ్ర చీడపీడల యాజమాన్య పద్ధతులు పాటించాలని ప్రభుత్వ వ్యవసాయ సలహా సేవలను వినియోగించుకోవాలని సూచించారు. ఈ శిక్షణ కార్యక్రమం ద్వారా రైతులు నూతన సాగు పద్ధతులను అవలంబించి, నాణ్యమైన దిగుబడులు సాధించడంతో పాటు సాగు ఖర్చులను తగ్గించుకోవాలని సూచించారు. ఈ కార్యక్రమంలో వ్య‌వ‌సాయ‌ విస్తరణ అధికారులు రామాంజనేయులు, గౌతమి, మనోజ్, జ్యోత్స్న, ధరణి, నేతాజీ పాల్గొన్నారు.