Visit:
నీలగిరి, నవంబర్‌ 30: జిల్లాలోని ఆరోగ్య శాఖ, ఎయిడ్స్‌ నియంత్రణ శాఖ అధికారుల సమిష్టి కృషి ఫలితంగా జిల్లాలో ఎయిడ్స్‌ తగ్గుముఖం పట్టింది. గతంలో ఎయిడ్స్‌పై పూర్తి అవగాహన లేకపోవడంతో కేసులు విచ్చలవిడిగా పెరిగిపోయేవి. ఎయిడ్స్‌ వ్యాధికి మందు లేకపోవడం నివారణ ఒక్కటే మార్గ కావడంతో జిల్లా ప్రజలను ఆదిశగా చైతన్యం చేసిన అధికారులు ఏటేటా రోగుల సంఖ్యను తగ్గిస్తూ వస్తున్నారు. దీంతో జిల్లాలో హెచ్‌ఐవీ బాధితుల సంఖ్య గణనీయంగా తగ్గింది. 18 సంవత్సరాల కితం 9 శాతంగా ఉన్న కేసుల సంఖ్య ప్రస్తుతం 0.5 శాతానికి తగ్గింది.
ఈ సంవత్సరం ఇప్పటి వరకు 36776 మందికి పరీక్షలు నిర్వహించగా అందులో కేవలం 174 మంది మాత్రమే ఎయిడ్స్‌ రోగులు ఉన్నట్లు జిల్లా అధికారులు గుర్తించారు. వీరిలో 21 మంది గర్భిణులు ఉన్నారు. గతంలో ఏడాదికి సుమారు వెయ్యిదాకా కేసులు నమోదైనా ప్రస్తుతం కేవలం 500లోపే నమోదవుతున్నాయి. ఇందుకు ప్రచారం కల్పించడమే ప్రధాన కారణమని వైద్య ఆరోగ్య శాఖ అధికారులు అంటున్నారు. హెచ్‌ఐవీ మహ్మమ్మారిని పారద్రోలేందుకు ప్రభుత్వాలు విశేషంగా కృషి చేస్తున్నాయి. పక్కదారి పడుతున్న యువత కారణంగా హెచ్‌ఐవీ విస్తరిస్తుంది. ఇది ప్రబలడానికి తప్పటడుగులు ఓ కారణమైతే అవగాహనలేమి మరో కారణం. మనిషి జీవితానికి మధ్యలోనే శుభం కార్డు వేసే ఈ మహమ్మారిని గుర్తించిన ప్రపంచ ఆరోగ్య సంస్థ 1988 నుంచి డిసెంబర్‌1న ప్రపంచ ఎయిడ్స్‌ దినంగా పాటిస్తోంది. అందులో భాగంగా స్టాఫ్‌ ఎయిడ్స్‌… కీప్‌ ది ప్రామిస్‌ నినాదంతో పనిచేస్తుంది.
బాధితుల సంరక్షణ ఇలా…
హెచ్‌ఐవీ పాజిటివ్‌ బాధితులను జిల్లా కేంద్రంలోని ఏఆర్టీ సెంటర్‌ లేదా సూర్యాపేటలోని ఏఆర్టీ సెంటర్‌కు పంపిస్తారు. అక్కడ వైద్యాధికారులు వారికి ఉచితంగా సీడీ4 పరీక్షలు చేసి కౌన్సెలింగ్‌ నిర్వహిస్తారు. అలాగే అవసరమైన మందులు ఉచితంగా అందజేశాస్తారు. 250 కంటే సీడీ4 కణాలు తక్కువగా ఉన్న వారికి ఎన్‌ఎన్‌ఆర్‌టీఐ, ఎన్‌ఆర్‌టీ మందులు అందజేస్తూ వారిని పరిశీలన, సంరక్షణ, కౌన్సెలింగ్‌ నిమిత్తం జిల్లాలోని మూడు ఆదరణ సంరక్షణ కేంద్రాలకు పంపిస్తారు.
ఏఆర్‌టీఐ మందులు క్రమం తప్పకుండా 6నెలల పాటు వాడినా, బాధితులను దగ్గరలోని ఏఆర్టీ సెంటర్‌కు పంపించి ఆ సెంటర్‌ ద్వారా మందులు ఉచితంగా పంపిణీ చేస్తారు. ఏఆర్టీ సెంటర్లలో క్రమం తప్పకుండా మందులు వాడిన పాజిటివ్‌ బాధితుల్లో సీడీ4 బరువులో పెరుగుదల లేని వారికి వైద్యులు, కౌన్సెలర్లు పరీక్షించి సెకండ్‌ లైన్‌ మందుల కోసం హైదరాబాద్‌లోని గాంధీ దవాఖానకు పంపిస్తారు. దీంతోపాటు జిల్లా వ్యాప్తంగా శుభం కార్యక్రమాలు నల్లగొండ యూత్‌ పాజిటివ్‌ సొసైటీ, ఇతర స్వచ్ఛం సంస్థలు, ఎయిడ్స్‌ నివారణ సంస్థల ఆధ్వర్యంలో అవగాహన కల్పించడంతో హెచ్‌ఐవీ పాజిటివ్‌ కేసులు నమోదు గణనీయంగా తగ్గుముఖం పట్టడం శుభసూచకంగా పేర్కొనవచ్చు.
ఉమ్మడి జిల్లాలో 48 పరీక్షా కేంద్రాలు..
జిల్లా వ్యాప్తంగా పీపీటీసీటీలు 2, ఐసీటీసీలు 7, ఎఫ్‌ఐఐసీటీసీ30, పీపీపీలు 8, ఒక మొబైల్‌ ఐసీటీసీ సెంటర్లతోపాటు మొత్తం 48 సెంటర్లలో హెచ్‌ఐవీ పరీక్షలు నిర్వహిస్తున్నారు. జిల్లా కేంద్రంలోని హెడ్‌క్వార్టర్‌ ఆస్పత్రిలో ఏఆర్టీ సెంటర్‌ నిర్వహిస్తున్నారు.దేవరకొండ, నాగార్జునసాగర్‌, మిర్యాలగూడ ఏరియా దవాఖానల్లోని మూడు లింక్‌డ్‌ ఏఆర్టీ సెంటర్లు నడిపిస్తున్నారు. వీటి ద్వారాపాజిటివ్‌ బాధితులకు ఉచిత వైద్యపరీక్షలతోపాటు ఉచితంగా మందులు, కౌన్సెలింగ్‌, వ్యక్తిగత కౌన్సెలింగ్‌ నిర్వహిస్తున్నారు. దాంతో పాటు ఏఆర్టీ సెంటర్లలో సీడీ4 పరీక్షలు ఉచితంగా నిర్వహిస్తున్నారు.
జిల్లాలోని 36 ప్రాథమిక ఆరోగ్య కేంద్రాల్లో పీసీలీటీ ఇంటిగ్రేటేడ్‌ కౌన్సెలింగ్‌ అండ్‌ టెస్టింగ్‌ సెంటర్‌ను(ఎఫ్‌ఐసీటీసీ ) 13 ప్రైవేట్‌ దవాఖానల్లో పబ్లిక్‌ ప్రైవేట్‌ పార్ట్‌నర్‌ షిప్‌ సెంటర్లు (పీపీపీ) ఉన్నాయి. వీటి ద్వారా 9928 మంది రోగులు తమ పేర్లు నమోదు చేసుకుని చికిత్స పొందుతున్నారు. ఈ కేంద్రాల ద్వారా హెచ్‌ఐవీ పరీక్షలు నిర్వహించడంతోపాటు గర్భిణులు, తదితరులకు వ్యక్తులకు పరీక్షలు నిర్వహించి పాజిటివ్‌ ఉన్న వ్యక్తులకు కౌన్సెలింగ్‌ నిర్వహిస్తారు.
నివారణ ఒక్కటే మార్గం..
ఎయిడ్స్‌ను అవగాహనతో నివారించుకోవచ్చు. ముఖ్యంగా యువతీ, యువకులు సురక్షిత శృంగార పద్ధతులు పాటించాలి. సురక్షితమైన రక్తాన్ని మాత్రమే ఎక్కించుకోవాలి. పాజిటివ్‌ వ్యక్తులు ఏఆర్టీ సెంటర్లలో అందజేసే మందులు క్రమం తప్పకుండా వాడితే జీవిత కాలాన్ని పెంచుకోవచ్చు. బోగస్‌ ప్రకటనలు నమ్మి మోసపోవద్దు. జిల్లాలో ఎయిడ్స్‌ నివారణ కోసం అనేక కార్యక్రమాలను నిర్వహిస్తున్నాం.
-డా.పుట్ల శ్రీనివాస్‌, జిల్లా వైద్యారోగ్యశాఖ అధికారి
