Nalgonda | గ్రామసభల్లోనే ‘ఇందిరమ్మ’ లబ్ధిదారుల ఎంపిక జరగాలి.. కలెక్టర్‌కు సర్పంచుల సంఘం జేఏసీ వినతి..!

నల్లగొండ రూరల్, అక్టోబర్ 13: ఇందిరమ్మ ఇళ్ల లబ్ధిదారుల ఎంపిక గ్రామసభల ద్వారా పారదర్శకంగా నిర్వహించాలని తెలంగాణ సర్పంచుల సంఘం జేఏసీ నల్లగొండ జిల్లా కమిటీ కోరింది.

నల్లగొండ రూరల్, అక్టోబర్ 13: ఇందిరమ్మ ఇళ్ల లబ్ధిదారుల ఎంపిక గ్రామసభల ద్వారా పారదర్శకంగా నిర్వహించాలని తెలంగాణ సర్పంచుల సంఘం జేఏసీ నల్లగొండ జిల్లా కమిటీ కోరింది. ఇళ్ల కేటాయింపులో అర్హులైన పేదలకు న్యాయం చేయాలని  సర్పంచ్‌ల సంఘం జేఏసీ నల్గొండ జిల్లా అధ్యక్షులు మేకల పల్లవి అరవింద్ రెడ్డి నేతృత్వంలో  కలెక్టర్‌ చంద్రశేఖర్ బడుగుకు సర్పంచ్‌లు వినతిపత్రం అందజేశారు.

కలెక్టర్‌ చంద్రశేఖర్ బడుగుకు వినతిపత్రం అందజేసిన సందర్భంగా సర్పంచ్‌ల సంఘం జేఏసీ నల్గొండ జిల్లా అధ్యక్షులు మేకల పల్లవి అరవింద్ రెడ్డి మాట్లాడారు. గ్రామ స్థాయిలో ప్రజలకు అందాల్సిన సంక్షేమ పథకాల అమలులో స్థానిక ప్రజాప్రతినిధుల భాగస్వామ్యం కీలకమని ఆయన పేర్కొన్నారు. గ్రామ సభల ద్వారా అర్హులైన లబ్ధిదారులను గుర్తించి, ఎలాంటి అవకతవకలకు తావులేకుండా ఇందిరమ్మ ఇళ్ల ఎంపిక ప్రక్రియను చేపట్టాలని అరవింద్ కలెక్టర్‌కు విజ్ఞప్తి చేశారు.

అర్హులైన పేదలకు ప్రభుత్వ సంక్షేమ ఫలాలు అందేలా అధికారులు చర్యలు తీసుకోవాలని ఆయన కోరారు. గ్రామాలలో త్రాగునీటి , విద్యుత్ సమస్యలు రాకుండా చర్యలు తీసుకోవాలని అన్నారు. కలెక్టర్‌కు వినతిపత్రం ఇచ్చిన వారిలో జిల్లపల్లి రేణుక రాజు, తగుళ్ల శ్రీను, షేక్ కమాల్, పెరిల్ల లింగయ్య, మల్లెబోయిన బుచ్చిరాజు ఉన్నారు.