తిమ్మాపురంలో భూముల రీ సర్వే పరిశీల‌న

కట్టంగూర్ మండలంలోని పరడ గ్రామ పంచాయతీ పరిధిలోని తిమ్మాపురం గ్రామంలో కొన‌సాగుతున్న భూముల రీ సర్వే ప్రక్రియను గురువారం తాసీల్దార్ పుష్పలత పరిశీలించారు. సర్వే పనుల పురోగతిని క్షేత్రస్థాయిలో పరిశీలించి సంబంధిత సిబ్బందికి పలు సూచనలు చేశారు.

కట్టంగూర్, నవంబర్ 05 : కట్టంగూర్ మండలంలోని పరడ గ్రామ పంచాయతీ పరిధిలోని తిమ్మాపురం గ్రామంలో కొన‌సాగుతున్న భూముల రీ సర్వే ప్రక్రియను గురువారం తాసీల్దార్ పుష్పలత పరిశీలించారు. సర్వే పనుల పురోగతిని క్షేత్రస్థాయిలో పరిశీలించి సంబంధిత సిబ్బందికి పలు సూచనలు చేశారు. ఈ సందర్భంగా ఆమె మాట్లాడుతూ.. భూముల రీ సర్వే ప్రక్రియను పారదర్శకంగా, పక్కాగా నిర్వహించాలని సూచించారు. సర్వే సమయంలో రైతులకు ఎలాంటి ఇబ్బందులు కలగకుండా చూడాలని, భూముల హద్దులు, విస్తీర్ణం తదితర వివరాలను క్షుణ్ణంగా పరిశీలించి నమోదు చేయాలని తెలిపారు. రైతులకు తమ భూములకు సంబంధించిన వివరాలపై ఏవైనా సందేహాలు ఉంటే నివృత్తి చేయాలని సిబ్బందికి సూచించారు. భూముల సర్వే సమయంలో రైతులు సర్వే సిబ్బందికి సహకరించాలని కోరారు. రీ సర్వే పనులను నిర్దేశిత సమయంలో పూర్తి చేసేందుకు అధికారులు, సిబ్బంది సమన్వయంతో పని చేయాలని పేర్కొన్నారు. ఈ కార్యక్రమంలో జీపీఓ జనార్ధన్, సర్వేయర్ అశోక్, వీఆర్ఏ షేక్ లతీఫ్, ప‌లువురు రైతులు పాల్గొన్నారు.