గురుకుల విద్యార్థుల‌పై వ‌స‌తి గృహా విద్యార్థుల దాడి

పాఠశాలల్లో, వసతి గృహాల్లో భద్రతా పర్యవేక్షణ లోపించడంతో న‌ల్ల‌గొండ జిల్లా పెద్ద‌వూర మండ‌ల కేంద్రంలో విద్యార్థులు అర్ధరాత్రి వేళ పాఠశాల ప్రాంగణం దాటి పట్టణంలోని రోడ్లపైకి చేరుకుని పరస్పరం ఘర్షణకు దిగిన ఘటన కలకలం రేపుతోంది. విద్యార్థులు రోడ్లపై వచ్చి కొట్టుకుంటున్న దృశ్యాల వీడియో...

– పెద్ద‌వూర‌లో ఈ నెల 4న జ‌రిగ‌న ఘటన ఆలస్యంగా వెలుగులోకి
– తల్లిదండ్రులు, స్థానికుల మండిపాటు
– మత్తు పదార్థాలకు లోనై ఈ ఘటన జరిగిందని ఆరోప‌ణ‌ల వెల్లువ‌

పెద్దవూర, నవంబర్ 11 : పాఠశాలల్లో, వసతి గృహాల్లో భద్రతా పర్యవేక్షణ లోపించడంతో న‌ల్ల‌గొండ జిల్లా పెద్ద‌వూర మండ‌ల కేంద్రంలో విద్యార్థులు అర్ధరాత్రి వేళ పాఠశాల ప్రాంగణం దాటి పట్టణంలోని రోడ్లపైకి చేరుకుని పరస్పరం ఘర్షణకు దిగిన ఘటన కలకలం రేపుతోంది. విద్యార్థులు రోడ్లపై వచ్చి కొట్టుకుంటున్న దృశ్యాల వీడియో బుధవారం వెలుగులోకి వచ్చింది. ప్రస్తుతం సోషల్ మీడియాలో వైరల్‌గా మారడంతో ఈ ఘటన చర్చనీయాంశంగా మారింది. మండలంలోని గురుకుల పాఠశాలకు చెందిన విద్యార్థులు ముగ్గురు ఈ నెల 4న సాయంత్రం వేళలో తినుబండారాల కోసం పాఠశాల నుండి పెద్దవూర‌కు చేరుకుని తినుబండారాలు తీసుకుని తిరిగి వస్తుండగా వసతి గృహాలకు చెందిన వివిధ పాఠశాలల విద్యార్థులు గురుకుల పాఠశాల ముగ్గురు విద్యార్థులను అడ్డగించి దాడికి దిగినట్టు తెలుస్తుంది. వీడియో చూసిన స్థానికులు, తల్లిదండ్రులు గంజాయి మత్తులో ఈ దారుణానికి ఒడిగ‌ట్టార‌ని ఆరోపిస్తున్నారు.

అసలు అర్ధరాత్రి వేళ విద్యార్థులు పాఠశాల నుండి బయటకు ఎలా వచ్చారు? వారు పట్టణంలోని రోడ్లపైకి చేరుకునే వరకు పాఠశాల సిబ్బంది, వసతి గృహాల వార్డెన్లు ఏం చేస్తున్నారు? రాత్రి వేళ విద్యార్థుల కదలికలను పర్యవేక్షించాల్సిన బాధ్యత ప్రిన్సిపాల్‌, వార్డెన్లకు లేదా? విద్యార్థుల భద్రత కోసం సెక్యూరిటీ సిబ్బంది కూడా లేకపోవడం వంటి వాటిపై తల్లిదండ్రులు, స్థానికుల నుండి ప్ర‌శ్న‌లు ఉత్ప‌న్న‌మౌతున్నాయి. గురుకుల పాఠశాలల్లో విద్యార్థుల క్రమశిక్షణ, ప్రవర్తనపై యాజమాన్యం ప్రత్యేక దృష్టి సారించాల్సిన అవసరం ఉందని స‌ర్వ‌త్రా అభిప్రాయాలు వ్య‌క్తం చేస్తున్నారు. విద్యార్థులు ఇలాంటి ఘర్షణలకు పాల్పడకుండా కౌన్సెలింగ్ నిర్వహించి వారి మానసిక పరిణతిలో స్నేహ సంబంధాలు, ప్రవర్తనపై మార్పు తీసుకురావాలని కోరుతున్నారు. పాఠశాల ప్రిన్సిపల్, వసతి గృహాల వార్డెన్ల పర్యవేక్షణ పూర్తిగా విఫలమైందని గురుకుల పాఠశాల ప్రిన్సిపల్, వసతి గృహాల వార్డెన్లు స్థానికంగా ఉండి ఉంటే ఇలాంటి ఘటన జరిగేది కాదని అంటున్నారు. వసతి గృహాల్లో కనీసం సెక్యూరిటీ గార్డు లేకపోవడం దురదృష్టకరమని తల్లిదండ్రులు వాపోతున్నారు. రాత్రి వేళ భద్రతా ఏర్పాట్లు, విద్యార్థులు బయటకు వెళ్లకుండా అధికారులు కళ్లు తెరిచి ఇలాంటి ఘటనలు పునరావృతం కాకుండా చూడాలని కోరుతున్నారు. ఈ ఘటనపై పూర్తి విచారణ చేపట్టి ఘటనకు బాధ్యులైన విద్యార్థులపై చర్యలు తీసుకోవాలని డిమాండ్ చేస్తున్నారు.