ఎడ్యుకేషన్‌ హబ్‌ ప్రాంగణంలో కంపుకొడుతున్న డ్రైనేజీ

సిద్దిపేట జిల్లా గజ్వేల్‌ పట్టణంలోనే ఎస్సీ, ఎస్టీ, బీసీ బాలుర, బాలికల వసతిగృహాలు తొమ్మిది ఉన్నాయి. గజ్వేల్‌ బాలుర ఎడ్యుకేషన్‌ హబ్‌ ప్రాంగణంలో ఉన్న ఎస్సీ బాలుర వసతిగృహంలోని డ్రైనేజీ పైపులు నిండిపోవడంతో దుర్గంధం వెదజల్లుతున్నది.

గజ్వేల్‌, జూలై 24: సిద్దిపేట జిల్లా గజ్వేల్‌ పట్టణంలోనే ఎస్సీ, ఎస్టీ, బీసీ బాలుర, బాలికల వసతిగృహాలు తొమ్మిది ఉన్నాయి. గజ్వేల్‌ బాలుర ఎడ్యుకేషన్‌ హబ్‌ ప్రాంగణంలో ఉన్న ఎస్సీ బాలుర వసతిగృహంలోని డ్రైనేజీ పైపులు నిండిపోవడంతో దుర్గంధం వెదజల్లుతున్నది. కొద్ది రోజులుగా డ్రైనేజీ పైపుల నుంచి మురుగునీరు పైకి ఉబికివస్తున్నది. వసతిగృహంలోని గదుల్లో కూర్చున్న విద్యార్థులకు వాసన రావడంతో తీవ్ర ఇబ్బందులు పడుతున్నారు.

గతంలోనే వార్డెన్‌ ఉన్నతాధికారుల దృష్టికి సమస్యను తీసుకెళ్లినా నేటికీ పరిష్కారం కాలేదు. డ్రైనేజీ సమస్యతో వసతిగృహంలోని కింది భాగంలోని కొన్ని గదులను వాడటం నిలిపివేశారు. బాలుర ఎడ్యుకేషన్‌ హబ్‌లోని ఎస్సీ, బీసీ వసతిగృహాలు రెండు పక్కపక్కనే ఉన్నాయి. వాటి మధ్యలో పిచ్చి మొక్కలు ఏపుగా పెరిగాయి. వసతిగృహాల చుట్టూ పరిసర ప్రాంతాలు పిచ్చిమొక్కలతో దర్శనమివ్వడంతో పారిశుధ సమస్య తీవ్రంగా కనిపిస్తున్నది. విద్యార్థులకు మెనూ ప్రకారం ఉదయం టిఫిన్‌, మధ్యాహ్నం, రాత్రి సమయంలో నాణ్యమైన భోజనాన్ని అందిస్తున్నట్లు విద్యార్థులు తెలిపారు. వసతిగృహాల వద్ద పారిశుధ్య సమస్యను పరిష్కరించాలని విద్యార్థుల తల్లిదండ్రులు కోరుతున్నారు.