చేతికొచ్చిన పంట పశువుల పాలు.. నీళ్లు, కరెంట్‌ లేక రైతుల ఇబ్బందులు

వర్షాలు కురువక భూగర్భ జలాలు అడగడంతో చేతికొచ్చిన పంట చేజారి పోతుందని రైతు పాండు నాయక ఆవేదన వ్యక్తం చేశారు.

మరికల్, అక్టోబర్ 13 : ఎల్ నీనో ప్రభావంతో వర్షాకాలంలో సక్రమంగా వర్షాలు కురువక భూగర్భ జలాలు అడగడంతో చేతికొచ్చిన పంట చేజారి పోతుందని రైతు పాండు నాయక ఆవేదన వ్యక్తం చేశారు. నారాయణపేట జిల్లా మరికల్ మండలంలోని బుడ్డగాని తండాకు చెందిన పాండు నాయక్ తనకు గల ఎనిమిది ఎకరాల్లో వరి పంట సాగు చేయగా బోర్లు ఇంకిపోవడంతో నూతనంగా 8 బోర్లు వేసిన చుక్క నీరు రాలేదు.

చేసేదిలేక మంగళవారం వరి పంటలో పశువులను వదిలి కన్నీరు పెట్టారు. 8 ఎకరాల్లో పెట్టుబడికి రెండు లక్షల 40 వేలు, బోర్ల కోసం రెండు లక్షలు అప్పు తెచ్చి పంట పొలాన్ని సాగు చేశానని ఆవేదన వ్యక్తం చేశారు. ప్రభుత్వం పంటలు నష్టపోయిన రైతులను ఆదుకోవాలని, ఎకరాకు 30 వేలు నష్ట పరిహారం చెల్లించాలని కోరారు.