Collector Ch. Priyanka | వారసత్వ సంపదను కాపాడుకుందాం : కలెక్టర్ సీహెచ్‌ ప్రియాంక

Collector Ch. Priyanka | భారత వారసత్వ సంపదను కాపాడుకోవాలని నారాయణపేట జిల్లా కలెక్టర్‌ సీహెచ్‌ ప్రియాంక సూచించారు.

మాగనూర్ కృష్ణ : భారత వారసత్వ సంపదను ( Heritage ) కాపాడుకోవాలని నారాయణపేట జిల్లా కలెక్టర్‌ సీహెచ్‌ ప్రియాంక (Collector Ch. Priyanka ) సూచించారు. ప్రపంచ పర్యాటక దినోత్సవం సందర్భంగా జిల్లాలోని కృష్ణ మండలం ముడుమాల గ్రామంలో 3,500 సంవత్సరాల నాటి చారిత్రక నిలువురాళ్ల వద్ద శనివారం ప్రత్యేక కార్యక్రమాన్ని నిర్వహించారు. జిల్లా పర్యాటక శాఖ ఆధ్వర్యంలో నిర్వహించిన కలెక్టర్ ముఖ్య అతిథిగా హాజరయ్యారు.

ఆమె మాట్లాడుతూ ముడుమాలలోని నిలువురాళ్లు వేల సంవత్సరాల చరిత్రకు, ఖగోళ పరిజ్ఞానానికి ప్రతీకగా నిలుస్తున్నాయని అన్నారు. ఇంతటి విలువైన వారసత్వ సంపద నారాయణపేట జిల్లాలో ఉండటం ప్రతి ఒక్కరూ గర్వించాల్సిన విషయమని పేర్కొన్నారు. పర్యాటక రంగాన్ని అభివృద్ధి చేయడం ద్వారా చారిత్రక, సాంస్కృతిక వారసత్వ సంపదను పరిరక్షించడంతో పాటు, వాటికి విస్తృత గుర్తింపు తీసుకురావచ్చని వెల్లడించారు.

ముడుమాల నిలువురాళ్లకు జాతీయ, అంతర్జాతీయ స్థాయిలో మరింత గుర్తింపు తీసుకురావడానికి కృషి చేయాల్సిన అవసరం ఉందన్నారు. డెక్కన్ హెరిటేజ్ సంస్థకు చెందిన ప్రొఫెసర్ ప్రవీణ్ నిలువురాళ్ల చారిత్రక ప్రాధాన్యత, వాటి వెనుక ఉన్న ఖగోళ సంబంధిత అంశాలను వివరించారు.

జిల్లా విద్యాశాఖ అధికారి డాక్టర్ గోవిందరాజులు , డీపీఆర్వో రషీద్, యంగ్ టూరిజం క్లబ్ నోడల్ అధికారి గోవర్ధన్ గౌడ్, ఎంపీడీవో కిషోర్ కుమార్, ఎంఈవోలు నిజాముద్దీన్, జనార్దన్ రెడ్డి, జీహెచ్ఎంలు వెంకటయ్య, ప్రదీప్ కుమార్, పీఆర్టీయూ జిల్లా అధ్యక్షుడు వై. జనార్దన్ రెడ్డి, మండల అధ్యక్షుడు శేఖర్, ముడుమాల, మురారిదొడ్డి గ్రామాల సర్పంచులు, ఉపసర్పంచులు, పర్యాటక శాఖ సిబ్బంది ,తదితరులు పాల్గొన్నారు.