గడిచిన రోజులన్నీ..

అన్నం తింటున్న షడ్రుచులు నాలుకను తాకుతున్నా నిన్న మట్టికుండలో తాగిన

అన్నం తింటున్న షడ్రుచులు
నాలుకను తాకుతున్నా
నిన్న మట్టికుండలో తాగిన
గంజిలోని కమ్మదనమే
మనసు లాగుతుంది

వెండిపళ్లెంలో పంచభక్ష్యాలు
కొలువుదీరినా
బంగారు గిన్నెలో అమృతమే నిండిపొర్లినా
పొలం గట్టున కూర్చొని
ఉల్లిపాయ కొరుకుతూ
సద్దిసారం రుచి ముందు ఇవన్నీ
దిగదుడుపే అనిపిస్తుంది

దేహాన్ని చుట్టుముట్టిన
ఈ పట్టువస్ర్తాల ఆడంబరాల కన్నా
నిన్న నా పేదరికపు గుడారంలో
ఆ చిరిగిన వస్త్రమే
ఆత్మకు పరమ ఆనందాన్నిస్తుంది

పాలరాతి శీతల సమాధుల్లా
ఇంటి నీడల్లో ఊపిరాడని స్థితిలో పోలిస్తే
గాలీ వెల్తురులో ఆత్మీయంగా ముచ్చటించే
నా పూరిగుడిసె పవిత్ర దేవాలయంలా అగుపిస్తుంది

కాలం మారి నాగరికత
మారి వాయువేగాన అన్నీ
సంక్రమించినా ఇప్పుడు
కేవలం సుఖప్రాప్తి
ఆకలి వెంటాడినా దరిద్రం
దాడి చేసినా నీడలేక
ఆకాశమే కప్పు అయినా
గడిచిన రోజులన్నీ తృప్తి

ఎన్నున్నా ఆశ వీడలేదు నేడు
లేనితనమైనా అర్రులు చాచలేదు..
అమ్మతోడు

కోటం
చంద్రశేఖర్‌
9492043348