పదేండ్ల తెలంగాణ ప్రకాశం..!

తెలంగాణొస్తే ఏమైతదనీ.. తెలంగాణొచ్చాక ఏమైందనీ.. ఏవేవో సూటిపోటు మాటలతో ఎగతాళి చేసితిరి కదా..!

తెలంగాణొస్తే ఏమైతదనీ..
తెలంగాణొచ్చాక ఏమైందనీ..
ఏవేవో సూటిపోటు మాటలతో
ఎగతాళి చేసితిరి కదా..!
రెండున్నర దశాబ్దాలుగా వింటూనే ఉన్నాం
కాలం గుండెకు
జై తెలంగాణ నినాదంతో
ఊపిరి పోస్తూనే ఉన్నాం..!
విప్లవానికి పర్యాయపదం కేసీఆర్‌ గళం
ఉద్యమానికి ఎవరెస్టు శిఖరం కేసీఆర్‌ బలం

రైతు చీకటి బ్రతుకు రాతలలో
రైతుబంధు నక్షత్రాల వెలుగొచ్చే..!
చీకటిని తరిమే స్ఫూర్తి శిఖలలో
వేడుకగా కోట్ల ఇంటికి కరెంటొచ్చే..!
బ్రతకడమే భారమైన ముసలోళ్ల
మోములో ‘ఆసరా‘ పున్నమి నవ్వొచ్చె..!
ఊరూరా పంటపొలాల గుండెలకు
వాగులు, చెరువుల గుండా
సెల్యూట్‌ చేసేలా నీళ్లొచ్చె..!

మతాల మధ్య మంటలు లేని
మత సామరస్యపు మానవీయ
గులాబీ జెండా వచ్చె..!
అన్నింటినీ మించి..
పేదోళ్ల పిల్లలకు గురుకులాల సాక్షిగా
కార్పొరేట్‌ ఇంగ్లిష్‌ సదువొచ్చె..!
మెడికల్‌ కాలేజీలకు ప్రాణం వచ్చె..!
పేదింటి ఆడపిల్లల లగ్గానికి కళ్యాణం
లక్ష కానుకగా ‘లక్ష్మి’ వచ్చె..!
భారతానికి తెలంగాణ భరోసానిచ్చె..!!
తెలంగాణ వచ్చాక
మన ప్రగతిపథం ఐరాసలో
ఎజెండాగా ఎక్కొచ్చె..!!
ఎంతని రాయాలి
ఏమని చెప్పాలి
అబద్ధాలు నిజాలు కావాలంటే
సాక్ష్యాలు కావాలి
సత్య ప్రతాపానికి సత్యముద్రికల
సంతకాలు చాలు..!
తెలంగాణ భావోద్వేగాల
ప్రభావ పాఠం కాదు
దశాబ్దాల బతుకు పోరాటాల
యుద్ధగీత సామ్రాజ్యం

ఫిజిక్స్‌ అరుణ్‌ కుమార్‌
9394749536