అయినా సరే
నేను రైతుగానే వుంటాను
రైతుగా పుట్టాను
రైతుగానే మరణిస్తాను..
కడగండ్లు రాలేదని కాదు
కరువులు కన్నీటి చెరువులైనా
చెక్కుచెదరలేదు..
అకాల వర్షాలు
కాలజ్ఞాన నైరాశ్యానికి
దారితీసినా బెదరలేదు..
పండిన ధాన్యానికి
దళారీ పురుగులు పట్టినా
మిగిలిన గింజల్తో గడుపుకొస్తున్నాను..
ఈ వృత్తిలోని అందమైన
నైష్పత్తిక సుఖమేమిటో
ఈ మట్టితో జరిపే
ఆత్మీయ సంభాషణలోని
ఆనందమేమిటో
నేనింకా మర్చిపోలేదు..
ఆకాశం వైపు చూసీ చూసీ
కండ్లు శుక్లాల దాకా వచ్చాయి!
నిలబడీ నిలబడీ
కాళ్ళల్లో వెరికోస్ పాములు చొరబడ్డాయి..
అయినా సరే..
నిబ్బరాన్ని వదిలిపెట్టలేదు
నిజాయితీని కోల్పోలేదు
రైతుకు అన్యాయం చేసేవాడు
నిజంగా సిగ్గుపడాలి
పండిన గింజల మీద
అతని పేరును గీకెయ్యలేరు కదా!
రైతులాంటి గొప్ప జీవితం
ఎవరికొస్తుంది కనుక
నిటారుగా జీవించే
ఈ శిరశ్శిఖరం ముందు
నింగి నివ్వెరపోతుంది..
అందరికీ అన్నం
ప్రసాదిస్తున్నామనే భావన
అమ్మలాంటిది కదా నాయనా..!
–డాక్టర్ ఎన్. గోపి