చేదు గురుతులు

మా అవ్వ వాకిట్లోకి వంటింట్లోకి

మా అవ్వ
వాకిట్లోకి వంటింట్లోకి
గిరగిరా తిరుగుతున్నపుడు
అవ్వ కాళ్ళకు నేలకు మధ్యన
పాదరసమేమన్నా పారుతుందేమోనని వెతికిన నాకు
కొయ్యకాళ్ళ ఒరుపులకు మడమలెంట
సన్నగా కారుతున్న రక్తం మరకలు కండ్లబడ్డయి
అవ్వా…
ఆకలైతందే అన్నప్పుడు
చప్పున కడుపులోకేదన్న ఇచ్చే అవ్వ చేతిలో
మంత్రదండమేదన్నా దాసిందేమోనని వెతికిన నాకు
వంటిల్లు మంటలకు, కలుపు కొయ్యల కోతలకు
అరసేతిలో పల్లెరుగాయలసొంటి
బొడిపెలు కండ్లబడ్డయి!
అవ్వా…
పరీచ్చలకు పైసలియ్యే అన్న ప్రతిసారీ
కొంగు కొసల ముడులిప్పే అవ్వ కొంగుల
గల్లగురిగేమన్నా దాసిందేమోనని వెతికిన నాకు
శీకిపోయిన శీరకు జల్లడసొంటి బొక్కలు
కండ్లబడ్డయి!
అవ్వా…
నౌకరొచ్చిందే అని ఉరికిపోయి చెప్పినపుడు
కోటి దీపాలోలే ఎలిగిన అవ్వ కండ్లల్లో
ఏ నూనె పోసిందోనని వెతికిన నాకు
బిగవట్టి ఆపుకున్న కన్నీళ్లు కండ్లబడ్డయి..!

వి.దిలీప్‌
84640 30808