మిరుగు – మెరుపు

అవ్వ ఇంగు బెల్లాన్ని వాడకట్టంతా పంచింది
అందరి నోరు తియ్య తియ్యన
దూరం నుంచి వాన చిన్కులు
పిల్లల నాల్కపై రాలి ఇంకా తియ్యన!

మిరుగు వచ్చిందంటే ఎక్కడా ఆగకుండా
ఆగమాగంగా వాన మబ్బులు రావాల్సిందే
ఎక్కడా చిన్కు తెగదు
ఏకధార ఏకధార.. ఏకధార!

సందడి సందడి
వాన సందడి
ఇగ రైతుకు తీరికేది
తిన పురస్తు దొరకదు
అందరికీ తినిపించుడే తెలుసు!

నాగలి నడక పరుగౌతుంది
గింజలపై పడ్డ చినుకు మొలకై పోకడ పోతుంది
లోక కళ్యాణం అంటే
ఆగకుండా ఆవురావురుమని వానలు పడుడే!

మిరుగు నాడు వాన పడ్డాకా
కాలం మహా మంచిగుంటదని
పెద్దలు మొగులుకు మొక్కి చెపుతరు
ఎక్కడా ఆకలి పత్తా ఉండదు!

ఇగ అన్నపూర్ణ గుడిలోనే కాదు
అందరి ఇంట్లోనూ కొలువై ఉంటుంది
ఇంట్ల ప్రతి బగోను అక్షయ పాత్రే!!

కందాళై రాఘవాచార్య 8790593638