పొద్దున్నే లేచిన మా అమ్మ పాత కుండల
పటికె బెల్లమేశి దాశిపెట్టినట్టు
నల్లటి కూరట్కెల
నాలుగు ఎర్ర మన్ను పెల్లలేశి
లోటెడు లీల్లు వోశి
గంటసేపు ఇంటి ఇడుపున
గడుపుమంటూ నానవెడ్తుండె
వొంట పనైనంక మల్ల ఆమెనేవొయ్యి
దూరంగొట్న పోరగాన్ని
దెగ్గర్కి దీస్కున్నట్టు
అటికె మీద ఐదేళ్ళేశి గుంజుకోని
ఇల్లంతా ఆవు పంచితం చల్లినట్టు
మంగళార్తి మనుషులందర్కి జూపెట్టినట్టు
అందంగా అల్కువూత చేస్తుండె
అదంతా ఆరకముందే
దేవుని ఇగ్రాన్ని పూవుల్తో పూదిచ్చినట్టు
ఇల్లంతా ముగ్గుల్వెట్టి లెస మురుస్తుండె
ఇంటిడుపులు జూసి
ఇల్లాలిని చెప్పొచ్చంటే
ఇదేమిడ్దిది అనుకున్న గాని
ఇల్లు గురించి మా అమ్మ జేసే
ఇగురం జూస్తే నిజమే అన్పిచ్చింది
సంటిపోరన్లెక్క ఇల్లంత దోగ్యాడి
ఇంట్లో అందం ఇర్గవూయించినా
అమ్మ అర్శేతికి గోరింట వెడ్తెనే
అసలైన ఆనందం నాకని
ఆరానికొక్కసారి అల్కువిడుస
ఆమె శెయ్యినందుకోనీకె
ఇగలేని ఆరాటపడ్తుండె
ఒచ్చిపొయ్యెటోల్లు ఒద్దిస్తె బాగుండదని
ఒయ్యారం ఒలుకవోసేటట్టు
ఇడుపుల మీద ఇంతశేపు
ఒడుపుగా నడుస్తుండె
అల్కువిడుసంటే అందినకాడికి
ఎర్రమన్ను నీల్లుదాగి
ఇంటి బయట మూలకు
ఇడుపులపోంటి కూసోని
ఇగలవట్టేది కాదు
ఇంటికీ ఇల్లాలికీ పేరుదెచ్చేది
అల్కువిడుసంటే
పనికిరాని బట్టపేగును
పనిలో పెట్టించనీకె
పాకులాడే రకం కాదు
ఇంతి పాదాలకు పసుపు లెక్క
గదువలకు గంధం లెక్క
ఇంటికి… అందాన్ని సలువను
అపురూపంగా అద్దేది
– కమలేశ్ 91603 96596