దీపావళి తెల్లారి రాలేదు
ఉదయం ఊరికే కదలదు కదా
వాకిట్లోని అక్షరాలను చదువుతున్నా
తమిళ తంబీలు నవ్వుతున్నారు నన్ను చూసి
వీధి నిండా
పిల్లల కేరింతలు పరుచుకున్నాయి
గాలి వచ్చి దాడి చేయక ముందే
నాలుగు ఫొటోలు తీసి
నిన్నటి ఉత్సాహన్ని వాట్సాప్ చేయాలి
అమ్మ లేచి ఊడవక ముందే
కాలని బాంబులు కొన్ని
కుప్పలు పోసి మంట పెట్టి
పిల్ల దీపావళి జరుపుకునేటోళ్ళం
బాల్యం అంటే భేషజం లేని జ్ఞాపకాలే
కాల్చిన చేతులు మసి బారితే
దేశమంతా చిచ్చుబుడ్లు నింగిలో
అక్కడి బాల్యం కరిగి కాలి
ఇక్కడ వాకిలి విర బూసింది
త్యాగాలు లేకుండా తళుక్కులు ఎక్కడివి
కాసిన్ని పటాసులు కాల్వకుంటే
కార్మికుల కడుపులు నిండేదెలా
ఆకాశం కొంత కోపగించినా
డబ్బులు వృధా కాలేదు
ఒక్క అమావాస్య ఎన్నో జీవితాలకు వెలుగులు
– దాసరి మోహన్ 9985309080